Kathmandu, Nailar : U MP jong ka Nepali Congress na Kathmandu u la Sunil Sharma u la shah kem namarba u la pyni da ki kot ki sla kiba thok ha kaba ïadei bad ka kyrdan pule jong u. U Sharma u la shah kem ha ka sngi hat majai jong ka taïew ha ka Central Investigation Bureau (CIB) jong ka Nepal Police. U nongaiktien jong ki pulit ka Nepal u Deputy Inspector General u Kuber Kadayat u la ong ba u MP jong ka Morang-3 konstitwensi u la shah kem namarba u la pyni da ki kot ki sla kiba thok ïa ka kyrdan pule jong u.
U Sharma uba pynïaid ïa kawei ka Hospital u la shah pynngat kyndon ruh 7 snem mynshuwa namarba la lap ba u don da ki kot ki sla kiba thok. Ka Nepali Congress kaba don ha ka liang synshar ka pyrshah halor ka jingshah kem jong u. “U la shah kem namarba u dawa ba u Myntri ka tnat kam pohïing bad tnat pla tyngka ba u dei ban risaiñ noh halor ka jingkhaïi ksiar tuh” ong u MP ka Nepali Congress u Arjun Nar Singh KC.
“Kumno 7 snem mynshuwa ki pulit ki la sangeh noh ïa ka jingtohkit katba mynta pat ki la khyllie biang” u la ong. U Sharma u dei uba ju kren pyrshah bha ïa u Myntri ka tnat kam pohïing u Narayan Kaji Shestha kumjuh ruh ïa u Myntri ka tnat pla tyngka u Prakash Sharan Mahat bad u la kynnoh ba ki donkti ha ka kam khaïi ksiar tuh.
U Sheastha u dei u MP jong ka seng CPN (Maoist Center) katba u Mahat pat u dei u MP jong ka Nepali Congress. Ha ka 18 tarik u Naitung, ki pulit ki la ïoh kurup haduh 100 kilo ka ksiar najan Kathmandu Airport. U sharma u la ong ba kat katei ka ksiar ym lah ban khaïi na Hong Kong sha Kathmandu lada khlem ka jingïadonkti lang u Myntri sorkar. Hadien ba u la shah kem, ka CIB ka la pyntip sha u Lamphang jong ka ïing Dorbar ba un dang shah tohkit katkum ki kyndon jong ka aiñ.
