Shillong, Nailar, 14: Ha ka jingrakhe ïa ka jingdap 25 snem, ka Seng Samla Mawkhar ka la buh hakhmat ïa ka thong ban pynlong ïa ka jingpynsngewthuh sha ki samla jong ka shnong Mawkhar bad ïa ki shnong kiba marjan kumno ban pyllait na ka shrip jong u drok.
Kane ka sienjam jong ka Seng Samla ka long ruh ban ïarap kino kino ki para samla kiba la im kyrni ha ka jingdih u drok bad kiba dang angnud ban kylla noh sha ka jingim kaba thymmai.
Ha ka jingïakren bad ki lad pathai khubor ha ka Lah Sngi u Blei, u President ka Seng Samla Mawkhar u Bah Daniel Syngai u la ong, “ngin sa pynlong ïa ka jingïalang ban pynsngewthuh sha ki para samla ha ka 19 tarik mynta u bnai bad mynta ka kynti ngi la wanrah ruh ïa u Tenzing Tsering uwei na ki Ayurveda Practitioner uba la sah ha New York, uba shong basah mynshwa ha Mission Compound, Shillong ban ïarap ïa ki samla kiba la ngop ha u drok ban ïoh binag ïa ka jingim ba thymmai tang da kaba dih da ki dawai kynbat.”
Ïa kane ka jingpynshai paidbah ka Seng Samla ka la ïatreilang bad ka NRE Pageant India Pvt. Ltd hapoh ka jingïalam jong u President u Bah Ransom Sutnga bad ka National Director ka Kong Eldora Lyngdoh.
“Nga la ïoh jingtip kiba don haduh 3 lak ngut kiba la ngop ha u drok ha kane ka Jylla,” la ong u Tsering bad bynrap, “km u briew uba la shong la sah ha kane ka jylla nga dap da ka jingsngewkhia halor kane ka khubor. Hynrei ka don pat ka lad bad ka kabu ban pyllait luid ïa kito kiba im kyrni ha u drok lada ki don ka jingangnud nalade ban ïoh biang ïa ka jingim ba thymmai.”
“Ki don ki dawai kynbat kiba nga la pyndonkam ban sumar ïa ki briew kiba la im kyrni ha u drok ha New York bad lada ki briew ha kane ka jylla kiba la ngop ha u drok ki kwah ban ïoh biang ïa ka jingkoit nga long uba kloi ban ïarap ïa ki,” la ong u Tsering.
Haba kyllli, u Tsering u la ong ba um don jingthmu ban plie ïa kano kano ka jaka ai jingsumar ha kane ka jylla hynrei u la ong ba u long pat uba kloi ban ïarap lada ki briew ki donkam ïa u ha kano kano ka por.
Ka Seng Samla Mawkhar ka lap ïa u Tsering dei lyngba ka jingïakren jong ka Kong Eldora Lyngdoh ha ka Facebook ha kaba u la pynpaw ïa ka mon ba u long uba kloi ban ïarap ïa ki samla kiba la ngop ha ka jingdih drok.
