Shillong, ïaïong, 22: U trai jong ka Saw Aiom Restaurant u Bah Shanbor Sohtun ha ka Lah Sngi u Blei u la mih shakhamt ban pynshai halor ka jingthaw jingklumar jong ki Khar Metor hapoh ka Restaurant kaba la jia ha ka miet sngi saitjain jong ka taiew baladep.
Ha ka jingiakren bad ki lad pathai khubor, u Bah Shanbor u la ong tang shu ioh jingtip halor kane ka jingjia marmar u la pyntip sha ki Pulit ha kaba ki la rah noh ia ki Khar Metor bad ia uwei u nongtrei jong ka Restaurant sha thanat.
U la iathuh ba ynda la poi ha thanat ki khar Metor ki la siew noh ia ka bai dih kyiad kaba ki la dih hapoh ka Restaurant bad ki Pulit ki la pyllait noh ia u nongtrei jong ka Restaurant.
Ha ka janmiet sngi Saitjaiñ ka la mih ka jingiakynroi bad ka jingiaktah kti hapdeng ki 4 ne 5 ngut ki khar Metor bad ki Khasi hadien ba ladep iadih iabam ha kawei ka Restaurant kaba kyrteng ka Saw Aiom Restaurant kaba don ha Iewduh, ha basa sohsaw kaba la long trai da u Bah Shanborlang Sohtun.
Katkum ka jingiathuh jong u Manager jong kane ka Restaurant u Shiv Kumar Singh, la ong ba kine ki ar kynhun ki la iasdang shwa ban ia kynroi hapoh ka Restaurant bad la ong ruh hadien ki la ia mih na Restaurant ki la ia thaw jingkulmar bad ban ia pyni bor sa shabar bad donbok da ka jingwan poi noh ki Pulit la lah ban tem ia ka jingkulmar.
Hynrei ka khubor kaba la saphriang ha ka social media la kynnoh ba dei ki kharmetor kiba la thaw jingkulmar hynrei ia kane ym pat lah satia ban pynthikna nangno nangno.
