Shillong, ïaïong, 22: Ki samla wadkam ka jylla ba la lamkhmat da ka samla Barilang Pyngrope ha ka Lah Sngi u Blei ki la leit ban iakynduh ia u Secretary jong ka Personnel & A.R. Department u Bah Cyril V. Darlong Diengdoh ban pan jingpynshai ha kaba iadei bad ka jingpynrit ia ka rta thungkam ha ka tnat Pulit.
Kum ban shu pyntip hangne, dang ha ka taiew baladep, ki samla wadkam ki la leit ban iakynduh ia ka Secretary jong ka Central Recruitment Board ka Mary TG Sangma hynrei ka la bthah ia kine ki samla ban leit iakynduh ia u Secretary jong ka Personnel & A.R. Department ka Sorkar Jylla ba kin ioh ia ka jingtip kaba bniah.
Dang shen ka tnat Pulit ka la pynbna ïa ka jingpyllait 2938 tylli ki post hapoh ka tnat Pulit. Ha kane ka jingpynbna, la pyntip ba ka rta rung kam na ka bynta ka post Constable ka long 21 snem bad 27 snem na ka bynta ka post Sub Inspector.
Ka Samla Barilang Pyngrope kaba la lamkhmat ia kane ka kynhun ki samla ha ka jingiakren bad ki lad pathai khubor, ka la ong ba ka jingiakynduh ia u Secretary ka Personnel & A.R. Department ka long beit halor ka jingpynbeit bad ka rta rungkam bad ia ka jingpynbna na kane ka tnat treikam jong ka sorkar hadien ba la pynmih ia ka Advertisement ha ka 6 tarik mynta u bnai.
“Ka jingkylli kaba mih mynta ka long kumno ka Jingpynbna kam pat mih bad ka dang don hapdeng ka jingpynkhreh katba ka Advertisement pat ka dang iaid. Ngi dang beit da ki jingkylli halor kane. Kane ka jingai jubab na ka Sorkar ngim lah shuh ban sngewthuh. Ngi sngew hi ba kane ka sorkar ka pyrshah ia ka jingkiew jong ki samla,”ka la ong.
Ka la ong ruh ba kumno ka jingkhot Advertisement na ka bynta ka jingpynrungkam ka la jan kut katba ia ka jingpynbna haduh mynta ka sorkar kam pat lah ban pynmih.
Shuh shuh ka la ong ba ka Sokar ka la dei ban pyrkhat lem ia ki samla namarba ki la shah ktah ha ka khlam COVID-19 kaba la lynshop ha ka jylla ha u snem 2020 bad 2021.
Uwei na ki samla wadkam u la iathuh ba ka jingdawa jong ki ka long ba ka Sorkar kan kyntiew ia ka rta thungkam haduh 30 snem.
