KREN KHOR U HEH PULIT ÏA KI NONGÏALAM KSU HA THANAT
Shillong, ïaïong, 03: U Assistant Secretary ka KSU, Seng Kmie Samla Reuben Najiar u la ong haba don kino kino ki jingjia, ki dkhot ka KSU ki long dieng shaiñdoh. Ki Pulit lada kim lah ban kem iano iano ki kem beit thik tang ia ki dkhot ka KSU tang ban pynkut noh ia ka Case jong ki, lehse ba kin ym shah pynbor nalor.
Ha ka jingiakren bad ki lad pathai khubor ha ka sngi Balang hadien ba la mih na Sohra Police Station, u samla Najiar u la ong, “ngi pynlong ia ka jingialang (ban pyrshah ia ka) Citizenship Amendment Act, hadien ka jingthang ia ka Rule jong ka CAA, ki dkhot ki la mih noh na kato ka jaka (Ichamati) bad wan phai noh. Ka don kata ka jingjia ba shah pyniap ki arngut (ki bar jylla), halor kata ka bynta ngi ki dkhot ka seng ngim don kano kano ka jingtip. Ka jingpharep ki bor Pulit bad na kiwei kiwei ki kynhun shit niam ba ngi donkti ma ngi, kata, ka long tang kaei kaei tang ban pynjah burom ia ka seng.”
U la iathuh ha ka por ba dang sdang (ka jingiakren) la don uwei na ki heh Pulit ka rukom kren jong u kaba kham khor. Ngi wan hangne ban iakren ngi da ka akor ka burom, ba phin kren tohmet ia ngi, ngim lah ban shah. Ka la mih ka jingiapynphai nia bad ngi la mut ban mih noh na ka jingialang bad ngi la ong ba lada uto u heh Pulit u dang don ha ka jingialang, ngin ym treh ban iakren, ngin ia mih noh shabar.. Hadien kata, ki Pulit ki la phah noh ia u ban mih shabar,” la iathuh une u nongialam ka KSU.
“Katba dang don ka seng (KSU) kiwei (kiba nabar) kim lah ban wan tuklar shapoh ka ri ka jong ngi,” u la ong.
“Ki Pulit ruh khlem da ioh ia ka sabut kaba biang ki shu kem ia baroh ki dkhot ka seng,” u la bynrap.
Haba iathuh ia ka jingiakren kaba mih bad ki Pulit ka Sohra Police Station, u samla Najiar u la ong, “ki Pulit ki ong ba ki wad ia ka jaka. Ngim shym ong ba ngim don hangto (ha Ichamati) hynrei ngi don ia ka jingialang hynrei tangba ngi don ia ka jingialang bad kata ka jingjia, ka jia, kam mut ba phi lah ban shu pharep ia ngi. Hato kano ka sakhi sabut kaba khlaiñ kaba phi lah ban ong ba ngi dei ma ngi. Hadien kata, ki Pulit ki pynshai ba ki kem ia kine ki arngut ki samla ba ki suba ba ki donkti bad ki lah ruh ban dei tang ki nongsakhi ruh ia kata kim lah ban batai bad ia kata kin dang tohkit kin sa tip.”
“Ia kata ka jingkren jong ki (Pulit) ngim lah ban pdiang. Haba phi la kem bad pynngat ha ki kyndon jong ka aiñ bad mynta phi pyllait ia ka kyrteng jong ki bad phi pyllait ia ka jaka sah jong ki, hato ha ka por ba shah pyniap u Lurshai Hynñiewta ki Pulit ki pyllait ia ki kyrteng jong kito ki dkhar? Katno ngut ki kem, ngi, ngim tip bad haba ki don ki Video Clip ruh hynrei ngim don jingtiphalor kata. Ka jingtohkit ka iaid haduh katno ym don ba tip. Balei ia kiwei pat phi buhrieh, katba ia ki dkhot jong ka seng ki pynpaw pyrthei. Hato lada ki lap hadien ba kim don eiei hato ki Pulit kin mih shakhmat ban ia ka jingkular ban pynshai,” la buh jingkylli une u nongialam ka KSU.
“Dei ha kum kine ki jingjia, ba kum ka seng ngim lah shuh ban shu iai sngap kumne ngi hap ban wan pan jingpynshai na ki bor pyniaid. Ki Pulit ki batai ba ia ka kyrteng la pyllait na ka ophis u Superintendent of Police. Nga kwah ruh ban kren ia ka ophis u Superintendent of Police, ki (dkhot ba la shah kem ka KSU) dei tang ki nongshah suba bad phim lah ban pyllait ia ka kyrteng jong ki. Lashai la shi sngi ka kam ka jam jong ki pat hato kan bah khlieh ka Sorkar lada ki lap ba kim donkti eiei,” u la ong.
“Sa kawei ki pynpaw ba ki dei ki dkhot jong ka seng, kata, ka pyni ba ka dei ka jingbthah jong ka seng kaba phah pyniap ia kita ki arngut. Ka jingleh jong ki Pulit bad ka jingbatai jong ki Pulit ba ki dei ki dkhot jong ka seng ka long kum ka jingpynthoh bria ia ka kyrteng jong ka seng,” u la kynthoh.
“Da kaba pynthohbria ia ka kyrteng jong ka seng, ki samla Khasi kiba don sha kylleng ki jaka bad sha kiwei kiwei ki jylla kaei ka ban jia ia ki da kaba pynpaw kyrteng kumta. Ka jingleh jong ki Pulit ka long ban wanrah ia ka jingsngew iapher jaidbynriew hapdeng ki jong ngi bad jong kiwei pat. Kata ka dei kaba ngi la iakren bad na ka liang jong ki Pulit ki la kubur ba ka jingleh jong ki ka long kaba bakla ba ki la kum pynpaw kyrteng,” u la ong shuh shuh.
“Ka jingiakren kam da dei eh kaba shong nongrim ba ki lah ban pyni ia kita ki sabut kiba biang ba haoid ngi ngi donkti, ngi la kren da kaba shai ba lada donkam ia kino kino ki dkhot ka KSU kren ha kaba shai, ngi kloi ban wan haba ngi khlem leh ia kano kano ka kam,” u la ong.
U la ong ruh ba ki dkhot ka KSU kim dei ki lehnoh hynrei ki dei tang ki samla pule bad ki don la ka jong ka ing ka sem bad kyntu ruh ia ki Pulit haba ki donkam ia ki dkhot ka Seng ki long kiba kloi ban wan shakhmat ha kano kano ka por.
“Lada ka ia ka jingiateh mynta ka sngi ki (Pulit) dang pynkheiñ, ngi ruh ngim banse ban shim da kawei ka sienjam.
Ngi, ngim lah ban tuklar ia ka jingtohkit jong ki Pulit. Kumba ki ong ba ki kem ia kine ki arngut tang ban shu tohkit ba lehse ki don ha kato ka jaka bad ba ka Mobile Location ruh ka don hangto. Ngi ong ba ngi don ha kato ka jaka ba ngi pynlong ia ka jingialang, khlempep, kan pynpaw ba ngi don ha kato ka jaka. Ngi la kren da kaba shai ba lada phim lap ia kino kino ki sabut kiba khlaiñ lait noh ia u Tower Location bad phim dei ban kem ia kino kino ki dkhot jong ngi bad na ka liang jong ki, ki ong ba kin burom ia kata, hynrei ki dang ap pat ia ka hukum kaba najrong,” la iathuh u samla Najiar.
Haba kylli, u samla Najiar u la ong, ba u SDPO u batai ba lada lap ba kine ki arngut kim don eiei ha kane (ka jingjia) ma u hi un mih shakhmat ban pynshai sha ki paidbah ba kine kim don bynta eiei.
“Ngi ngeit ba kum u rangbah briew un bat ia kata ka kular jong u bad lada khlem pynngat kyndon, ma u un sa mih shakhmat ban pynshai sha ki paidbah. Balei ngi nud ban wan, namarba ngi tip ba ngim don eiei halor kane ka bynta (ban pyniap ia ki arngut ki bar jlla), ngi khlem leh eiei ia kane ka kam. Dei halor kata ka nongrim ba ngi la pynsngew ha ki bor Pulit ba lada ki Pulit ki dang iai kem shi iai kem kumne shiteng miet shiteng synnia bad ban pynjynjar ia ki longing longsem, ia ki kmie ki kpa, ban pyntieng pynsmiej ia ki baroh, na ka liang ka seng, nangne shakhmat ngin ym iakren shuh bad lehse ngin shim da kiwei kiwei ki sienjam,” ong shuh shuh u Samla Najiar.
