Delhi, ïaïong, 03: Ka Election Commission of India (ECI) ha ka sngi Balang ka la pynlong ïa ka jingïalang bad baroh ki Jylla/Union Territory ban peit ïa ka jinglong jingman jong ka shongsuk shongsaiñ, ka jingtehlakam ïa ki kam beaiñ, ka jingkurup bad ka jingpeit bniah ïa ki jaka khappud hapdeng ki jylla bad ki jaka khappud jong ka ri ha kine ki elekshon Lok Sabha bad ki elekshon sha ki iing dorbar thaw aiñ ha ki jylla 2024 khnang ban don ka jingjied nongmihkhmat kaba ïaid beit ïaid ryntih. Ka jing thmu jong kane ka jingpeit lang ïa ki kam ka dei ban wanrah lang ïa baroh kiba ïadon bynta ha kine ki kam ha kawei ka rynsan ban don ka jingïatreilang kaba ïaid beit ïaid ryntih hapdeng ki ophisar jong ki jylla/UT ba marjan ha ryngkat ki kynhun Sorkar pdeng kiba ïada ïa ki jaka khappud. Ka Commission, ka la peit bniah ïa ki bynta ba kongsan kiba ïadei bad man ka jylla/UT.
Kane ka jingïalang ba la ïalam da u Chief Election Commissioner, Rajiv Kumar ha ryngkat ki EC, Gyanesh Kumar bad Sukhbir Singh Sandhu ka dei kaba la wan ïashim bynta lang da ki ophisar na ki Jylla / UT bad ki kynhun Sorkar Pdeng kiba ïada ïa ki jaka khappud.
U CEC Rajiv Kumar ha ka jingai jingkren jong u, u la ban jur halor ka jingkut jingmut ka Commission ban don ka jingjied nongmihkhmat kaba hok, kaba ryntih, kaba lait na ki jingkulmar bad ki jingkhring ïa ki briew ha ki rukom bym ïahap, bad u la kyntu ïa baroh kiba ïadon bynta ha kane ka kam ba kin ïatrei lang ban bat ïa ka burom jong ka kam jied nongmihkhmat bad pynthikna ïa ka jingïakhun kaba ryntih. U la bthah ïa ki Jylla / UT ba kin pynthikna ba man u nongjied nongmihkhmat u ïoh ban pyndonkam ïa la ka hok khlem ka jingtieng ne ka jingshah byrngem. U CEC Kumar u la kyntu ïa baroh ki Jylla / UT bad ki kynhun ban pynkylla ïa ka ‘jingkut jingmut’ jong ki sha ki ‘kam’ na ka bynta ka kam jied nongmihkhmat kaba hok, kaba laitluid, kaba lait na ki jingkulmar bad ki jingpyntieng.
Ki bynta ba kongsan ba la ïakren ha kane ka jingïalang ki kynthup ka jingdonkam ban kyntiew ïa ka jingïatreilang hapdeng ki Jylla / UT; ka jingkyrshan na ka bynta ka jingwanrah ïa ki CAPF ba la pynbiang na ka bynta baroh ki Jylla / UT; ka jingkyrshan na ka bynta ka leit ka wan ki dkhot CAPF ha ki Jylla / UT ba don ha ki jaka khappud; ka jingithuh bad ka jingpeit ïa ki jaka ba don jingma kiba lah ban ktah ïa ka kam jied nongmihkhmat; ki sienjam ban peit ïa ki jingïathut hapdeng ki jaitbynriew kumba la ïohi na ki por ba la leit, bad ka jingpeit bniah ban tehlakam ïa ki kam beaiñ na ki jaka khappud. Ka Commission ka la ban jur halor ka jingkongsan jong ka jingpeit bniah ïa ka jingtehlakam ïa ka jingpynkit ïa ki mar beaiñ kum ki jingdih pynbuaid, ki suloi bad ki jingpynbthei na ki jaka khappud jong ka ri. Ka la bthah ban peit ïa ki jaka ba rung bad mih ka kyiad bad ka pisa ha ki jaka khappud, ka jingtehlakam ïa ka jingthung ïa u kynja ha katto katne ki jylla.
Ka Commission ka la peit biang ïa ka jingkyrshan na ka Indian Air force bad ka tnat pynher liengsuin ha ki jylla ban pynpoi ïa ki kynhun pynlong elekshon sha ki jaka ba jynjar ban poi ha 11 tylli ki jylla kum ka Arunachal Pradesh, Chhattisgarh, Maharashtra. La bthah ban pynbiang ïa ki jingpynshngaiñ ban ïada ïa ki nongtrei seng saiñ pyrthei bad ki kyrtong katkum ka jingsngewthuh ïa ka jingma, khamtam ha ki jylla kum ka Chhattisgarh bad Jammu & Kashmir. La ïakren ruh shaphang ki jingkulmar ba dang shen ha Manipur bad ka jingktah jong kane ïa ka jingpynlong ïa ka jingjied nongmihkhmat kaba ïaid beit ha kaba ka Commission ka la bthah ban ai jingïarap ïa ki briew kiba la hap phet na la iing bad ban pynthikna ba ki ïoh lad ban shim bynta ha ka kam jied nongmihkhmat.
Kine ki long ki jingbthah kiba ïadei bad ka Aiñ bad ka Shongsuk Shongsaiñ, ki jaka talasi ha ki jaka khappud hapdeng ki jylla bad ki jaka khappud jong ka ri ban don ka jingpeitngor kaba bniah, ka jingïasam jingtip hapdeng ki distrik ba marjan shaphang ki runar bad ki nongpynkulmar, ka jingkhang ïa ki jaka khappud hapdeng ki jylla ban ïada na ka jingthep vote beaiñ ha ki 48 kynta shuwa ka jingthep vote, ki jingïalang ba man ka por hapdeng ki bor distrik kiba hap hapoh ki jaka khappud, ka jingpynkhlaiñ ïa ki jingïaid pahara da ki pulit ha ki distrik ba don ha ki jaka khappud, ki jingbuh shuh shuh ïa ki jaka talasi ha ki jaka ba biang ha ka jingïatreilang bad ki jylla ba don ha ki jaka khappud, ka jingkhang ïa u pud u sam jong ki jylla ha ka sngi thep vote, ki Excise Commissioner jong ki Jylla / UT khappud ki hap ban pynthikna ïa ka jingshisha jong ki permit, bad pynlong ïa ki talasi ïa ki dukan die kyiad khamtam ha ki distrik khappud, ka jingwan buh ha ka por kaba biang ïa ki atiar bad ka jingpyntreikam ïa ki Non- Bailable Warrant, ka jingpynshitom ïa ki runar, kiba donkti ha ki kam pynkulmar ha ki por jied nongmihkhmat, ka jingpynbiang ïa ka jingshngaiñ jong ki nongtrei seng saiñ pyrthei / kyrtong katkum ka jingsngewthuh ïa ki jingma.
Ka jingpeit ïa ka rukom pynlut pisa: Ka jingtehlakam ïa ka jingïaid ka kyiad, ka pisa, ki drok lyngba ki jaka khappud hapdeng ki jylla bad ki jaka khappud jong ka ri, ka jingpynkhlaiñ jong ka jingpeit ïa ki jaka talasi ha kaba la pynbiang ruh ïa ki CCTV Camera, ka jingtalasi lang da ki bor pulit, excise, transport, GST bad Tnat forest, ka jingpeitngor ha ki jaka pynher helicopter, ki kad liengsuin, ki steshon bus bad ki steshon rel, ka jingpynshitom ïa kito kiba pynïaid beaiñ ïa ka kyiad bad ki drok; tehlakam ïa ka jingpynïaid ïa ka kyiad lieh, ka jingpeit ïa ki jaka ba pynïaid bha ka kyiad, ka pisa, ki drok bad ki mar ba ai ei.
Ki jingbthah ïa ki Kynhun Sorkar Pdeng: Ka jingpeit bniah ïa ka jaka khappud hapdeng ka India bad Myanmar da ka Assam Rifles; khappud India Nepal da ka SSB khamtam ha ki jaka ba suk ka rung ka mih sha Nepal; ka khappud India bad Bangladesh bad ka khappud ha ka thaiñ sepngi da ka BSF; ka khappud India bad China da ka ITBP, bad ki jylla ba khappud ïa ka duriaw da ka Indian Coast Guard.
Ka Assam Rifles kan pynlong ïa ki jingïakynduh na ka bynta ka jingïatreilang bad ki pulit jylla, CAPF, bad kiwei kiwei.
Ka SSB kan peitngor ïa ka jaka khappud bad ka Nepal bad Bangladesh ban tehlakam ïa kano kano ka kam beaiñ, khamtam ha ki 72 kynta shuwa ka por ba la buh ban thep vote.
Pynthikna ka jingsngewthuh ki CAPF ïa ki jinglong jingman ha ka jingïatreilang bad ki bor pynïaid shnong.
Ka jingpynbiang ïa ki jaka talasi ha ka jingïatreilang bad ki pulit jylla
Ki Chief Secretary, DGP, Principal Secretary (Home), Pr Secretary (Excise), Chief Electoral officer bad State Police Nodal Officer jong baroh ki Jylla / UT, ki khliehduh jong ki Kynhun Sorkar Pdeng kiba trei ha ki kam ïada ïa ki jaka khappud kum ka Border Security Force, Assam Rifles, Sashastra Seema Bal, Indo Tibetan Border Police bad Coast Guard ha ryngkat ki khliehduh jong ka CRPF, Central CAPF nodal officer, Additional Secretary MHA bad ki nongmihkhmat na ka Tnat Ïada Ri bad Tnat Rel ki la ïashim bynta ha kane ka jingïalang.
