Shillong, Naitung 17 : Hadien 30 snem ba la ngam sha ki lawbah lawsan jong ka ri Bangladesh, jngai na la ka ri baieid, ki nongialam jong ka seng kieng atiar Hynniewtrep National Liberation Council (HNLC) kiba la wan poi sha ri Khasi na ka bynta ka jingiakren iasuk bad ka Sorkar Pdeng bad ka Sorkar Jylla, ha ka 17 tarik u Naitung, 2023 ki la iohlad ban leit buh syntiew hakhmat u dur mot jong u Syiem ka Hima Nongkhlaw u Paiem Tirot Sing uba don ha madan Iewrynghep, Shillong ha ka jingrakhe ia ka lyngkhuh sngi iap kaba 188 snem jong une u khlaiwait ka jaidbynriew Khasi.
Ha ki kynta ba ka kynhun jong ka seng HNLC ba la ialam da u Vice Chairman u Bah Manbhalang Jyrwa ki leit buh syntiew hakhmat u durmot jong u Syiem Tirot Sing, la synran lang da ki nongialam jong ka Khasi Students Union ba la lamkhmat da u samla Lamboktarwell Marngar, ka Hynniewtrep National Youth Front ba la lamkhmat da u Bah Sadon Blah, ka Hynniewtrep Integrated Territorial Organisaton ba la lamkhmat da u Bah Donbok Dkhar bad ka East Khasi Hills Local Taxi Welfare Association ba la lamkhmat da u Bah Wandonbok Jyrwa.
U President ka KSU u Samla Lambokstarwell Marngar haba kren ha ka jingialang ba lyngkot, u la ong, “ban kynjoh sha ka rynieng ka ryniot jong ki riewkhraw kam shong-eh ha ka rta hynrei ha ki kam kiba ngi trei na bynta ka ri bad ka jait bynriew .”
“Kum ka pateng mynta, ngim dei ban kylli mano ban trei ia ka kam jong ka jait bynriew, hynrei ka shong ha ka mon ba jwat jong ki khun samla jong ka jait bynriew. Ngim dei ban shu long tang ki nongwoh kjat ha ka rynsan jong ki Social Media, hynrei ngi donkam ban mih shakhmat ban leh eiei na ka bynta ka bha ka miat jong ka imlang ka sahlang,” la ong u Samla Marngar.
Une u nongialam ka KSU u la ther tyngeh ia ka Sorkar Jylla da kaba ong, “pynduna ka jingpynpah sairen hynrei dei ban pynjur ia ki kam hapoh Secretariat khnang ba kan long ka jingmyntoi ia ka jaitbynriew namar kumba long mynta ngi lah kynjoh palat 50 snem ha ka jingioh ia ka jylla bapura katba ki aiñ ki kanun ban iada ia ka ri ki dang duna.”
