Shillong, Lber 03: Hadien ka jingjia ba itriem ha ka miet 20 tarik, Rymphang ha kaba ka la don ka jingïashoh ïadat kaba la poi ruh sha u pud ban sei tari bad ïadung, ki nongkitkam jong ka Dorbar Shnong Urkaliar ki la ïaid pahara ban pyntikna ba kan ym don shuh kaba kum kane ka jingjia hapoh u pud u sam jong ka shnong.
Ki nongïalam jong ka Dorbar Shnong Urkaliar kiba la sdang ïa ka jingïaid pahara mynmiet naduh ka 24 tarik, Rymphang haduh mynta da ka jingsynran lang jong ki Pulit ka Nongmensong Police Out Post.
Naduh ba la jia ka jingïashoh ïadat ha ka 20 tarik, Rymphang, ka Dorbar Shnong marmar ka la lum da ka jingïalang ha ka 24 tarik, Rymphang bad shim ruh da ka rai ban ym shah shuh ban die jingdie palat ïa ka 10:00 baje mynmiet shaneng bad ha kajuh ka por ka Dorbar Shnong ka la thaw ruh da ka Village Defence Party (VDP) bad la bthah ïa ki trai dukan ba ki dei ban pyndait ïa ki CCTV hakhmat ki dukan jong ki.
U Secretary ka Dorbar Shnong Urkaliar Bah Samborlang Diengdoh ha ka jingïakren bad u nonglum khubor u la ïathuh hadien ka jingïalang kaba la long bad ka Deputy Commissioner ka East Khasi Hills District ka Kong RM KUrbah ka Dorbar Shnong ka la rai ban pynlong da ka jingïaid pahara hapoh ka shnong ha ka por mynmiet khnang ba pynthikna ba kan ym don shuh kano kano ka jingjia kaba sngewsih hapoh ka shnong ka thaw ha kaba ki longkmie bad ki rangbah ki la shim ïa ka jingkitkhlieh ban peitngor ïa ka shnong ka thaw da ka jingsynran lang jong ki Pulit.
