Shillong, Lber, 02: Uwei u briew ba la kynnoh ba u dei uba donkti ban shalan mar be-ain u la shah siat ïap ha ki shipai BSF jong ka Meghalaya Frontier ha ka miet sngi Thohdieng, katba uwei pat u nong Bangladesh u la mynsaw jur ha kane ka jingsiat kuli jong ki shipai BSF.
U Asen M. Marak, uba la don kumba 40 snem ka rta, u la duhei ïa la ka jong ka jingim ha ka jingsiat kuli jong ki shipai BSF katba ki paidbah ki dang pyrshang ban patan ïa u na ka jaka ba la jia ka jingïasiat, kaba jngai kumba 300 mitar na khappud, ka bym pat ker sainar shiah. Ïa uba la mynsaw, ki Pulit bad ki shipai BSF ki dang pynlong ka jingtohkit kaba bniah ban tip kyrteng bad ïa ka jaka sah.
Haba pynshisha ïa kane ka jingjia, ka Sub Divisional Officer (Civil) jong ka Sohra, ka Salon Verma ka la ong ba ïa kane ka kam mynta ka dang don hapdeng ka jingtohkit katkum ki kyndon jong ka aiñ. “Da lade hi ngan sa shimti ban tohkit ynda ka kynhun tohkit ka la wan phai ban wanrah ïa ki jingtip kiba bniah ba la ïohlum. Ïa ka postmortem yn sa leh ha Sohra, bad hadien kata ka aiñ hi kan sa leh ka la jong ka kamram,” ong ka Verma haba ïakren bad u nongthoh khubor lyngba ka telephone.
Kane ka la jia ha ha shnong Dalia hajan Shella, East Khasi Hills District ha ka por kumba 8 baje mynmiet, haba ki shipai BSF kiba dang ïaid pahara ki la khang lynti ïa ka kynhun jong ki birew kiba thmu ban shalan tuh ïa ka shini, u piat bad ïa kiwei kiwei ki mar ha ka dor kaba rem sha ka ri Bangladesh.
Ka shnong Dalia ka dei kaba la buhai shnong da ki Garo bad ka thymmei khubor ka ïathuh ba ki kam runar ruser ki ju jia bha watla kam pat ju don satia kano ka jingïatakhuh bad ki bor jong ka aiñ ha ki sngi ba la leit noh.
Katkum ka jingai jingtip ba malu mala halor ka jingjia, u Heh Ophisar BSF uba shimti ïa kane ka kam u la ong ba kine ki jingjia ki ju jia manla ka por, hynnin ka sngi ha ka por kumba 300 ngut ki briew na India bad Bangladesh ki la ïatakhuh bad ki shipai BSF katba ki dang pyrshang ban pynpulom ïa ki kam khaïi tuh bad khnang ban pynjem ïa ki paidbhur ki shipai BSF ki la siat ar kuli ha kaba u Asen Marak u la ïap.
“Kumba 300 ngut ki briew na khappud ki la ïalum ban pynibor ïa ki shipai BSF. Katba ka kynhun ka dang ïatakhuh bad ki shipai BSF, sa kawei pat ka kynhun ka la shim kabu ban pynduh ïa ki sakhi satar da kaba patan ïa ki mar khaïi tuh ryngkat bad u Marak uba la mynsaw jur hadien ba la shah siat kuli bad khladnoh namar ka jingjur palat ka jingphlei snam,” ong u heh shipai BSF.
Une u Heh shipai BSF u bym kwah ban pynpaw kyrteng ha ka jingïakren bad u nongthoh khubor lyngba ka telephone u ong ba ka don ruh ka video ba la ïoh ring kum ka sakhi halor kane ka jingjia ha ka shnong Dalia.
“Ki shipai ki la kawang da ki bom pynsat khmat bad ka PAG (pump action gun) ban pynpra ïa ki paidbhur kiba la sdang ban pynibor. Ki la pyndonkam da ki wait, ki tari bad da ki tiar pynmynsaw katba ki ïoh bad sdang ban ktah kti ruh wat ïa ki shipai. Dei na kane ka daw ba ki shipai kim banse ban siat pynma shwa shi kuli sha suiñ, bad haba ïohi ba kane kam pyntieng satia ïa ki paidbhur, ki shipai ki la siat biang sa shisien, kaba pynlong ïa u Marak ban mynsaw jur bad mar mar ki paidbah ki la paring noh ïa u bad kit ïa u sha shnong, bad khladnoh na ka jingmynsaw jur,” ong shuh shuh une u heh shipai BSF.
