Shillong, Rymphang, 6: Ka Election Commission of India (ECI) ka la pynmih ia u kyrwoh ban maham ia baroh ki Seng Saiñpyrthei bad ia ki kyrtong kiba iakhun elekshon ba kim bit satia ban pyndonkam da ki khynnah rit ha ki rynsan elekshon.
U kyrwoh u ong ruh ba ym lah ban pyndonkam da ki khynnah kum haba sam notis, sam poster ne ban rwai, pule poitri, shad ne kino kino ki prokram kiba don jingiasnoh bad ka elekshon.
Ka ECI ka ong ruh ba ki seng bad ki kyrtong kin peit bha ban ym pynkheiñ ia ki kyndon jong ka Child Protection Act bad ka la bthah ruh ia ki State Election Commissioner bad ia ki District Election Officer ba kin pyntreikam pyrkhing bha ia kane ka jingbthah.
Hynrei ka ECI ka la ong pat ba u kyrwoh um thew pat ia kino kino ki khunlung barah ne bah ki kmie wat lada ki don hajan jong ki rynsan elekshon.
Shuwa kane, ka ECI ka la pynmih da ka jingmaham ia ki seng saiñpyrthei bad ia ki kyrtong ba kim bit satia ban pyndonkam ia ki kyntien kiba khor ne ban kren beiñ ia ki briew ba don jingduna dkhotmet ha ki rynsan ialap elekshon.
