Shillong, K’lyngkot, 10: Ka Khasi Hills Autonomos District Concil (KHADC) ha ka sngi Balang ka la pan sakhi na ka Joint Action Committee Raid Saw Symper halor ki jingkynnoh pyrshah ïa u Syiem jong ka Hima Maharam u Pa’iem Niandro Syiemïong.
Kane ka jingpan sakhi jong ka tnat Elaka ka KHADC ka long hadien ba ka JAC kaba kynthup ïa ka KSU, FKJGP, HYC bad HUAM na ka thaiñ Saw Symper ki la ujor pyrshah ïa u Syiem ka Hima Langrin bad dawa ruh ïa ka District Council ban pynhiar noh shisyndon ïa u.
U Secretary jong ka JAC Bah Drimshon Mawleiñ, Secy ha ka jingïakren bad ki lad pathai khubor u la ïathuh ba ki nongïalam ki la pynpaw hakhmat u Dy. Chief Executive Member (Dy. CEM) uba peit ïa ka tnat Elaka, u Bah Pynshngaiñ N. Syiem ba kum ki khun ki hajar jong ka Hima kim don shuh ka jingshahniah ha u Syiem Niandro Syiemïong da kaba kynnoh ba u long u mawjynthud, u nongpynkulmar shnong bad uba pynduh ïa ka shongsuk shongsaiñ.
“Ngi kum ki nongshong shnong bad kum ki khun ki hajar jong ka hima, ngim shahniah shuh ïa une u Syiem namarba u long u mawjynthud, u long ruh u nongpynkulmar shnong bad u long ruh u nongpynduh ïa ka shongsuk shongsaiñ bad ha ka dong ka thaiñ bad ha ka Hima hi baroh kawei,” u la ong.
Haba ïathuh ïa ka jingieng pyrshah jong ka JAC ïa u Syiem Niandro u Bah Mawleiñ u la ong, “ka dawbah ba ka JAC ka la ujor pyrshah ïa u Syiem ka long halor ka jingpynmih ïa ka jingpynbna paidbah ha ka 31tarik, Nohprah, 2020 ban khrong khajna ïa ka khyndew ka shyiap hapoh ka Raid Sawsymper. Ngi ki khun ki hajar bad ki paidbah nongshong shnong ngi pyrshah jur ïa kane.”
“Katkum ka soskular ba la ïateh hapdeng u Syiem Bamon Sing Syiem, uba long u Syiem barim jong ka Hima Maharam bad ki riew rangbah jong ka Raid ha ki snem 1944 hynrei une u Syiem ba mynta ka Hima Maharam u la pynkheiñ ïa ka jingïateh soskular. Dei halor kata ka daw ba ngi la hap ban ujor sha ka District Council namarba u Syiem u la sdang ban mushlia ïa ka khyndew ka shyiap hapoh ka Dorbar Raid,” la ong.
“Ngim don shuh ka jingshaniah ïa une u Syiem bad ngi dawa ïa ka District Council ba ka dei ban pynhiar khet shi syndon ïa u,” la pynpaw u Bah Mawleiñ.
“Hadien ba ngi la ujor, ka District Council ka la pynmih ïa ka Stay Order ban pynsangeh ïa ka jingpynjari hukum jong u Syiem ban khrong khajna ïa ki nongshong shnong jong ka Raid Sawsymper, um shym la burom satia ïa ka Stay Order ba la pynmih da ka District Council. U la pynmih ïa ka hukum ban khrong khajna ïa ki trok kit maw ha ki jaka tih maw kiba don hapoh ka Raid Sawsymper,” la kynnoh une u nongïalam ka JAC.
“U (Syiem Niandro) ong ba u burom ïa ka Soskular ba la ïateh bad ka Dorbar Raid hynrei ki kam pat ki long markhongpong. U burom da ka ktien hynrei ki kam u leh da kumwei,” la kynnoh shuh shuh u Bah Mawleiñ.
“Kum ka JAC, ngi da maham jur la ka long ïa ki riewshimet, ïa ki politishian lane ïa kino kino ki kynhun kiba wan mushlia ïa ki kam jong ka Raid Sawsymper. Kim bit ban mushlia ïa ki kam jong ka Raid namarba kim tip ïa ka sdang bad ka kut bad kim tip ïa ka im bad ka ïap jong ka Raid baroh kawei. Dei tang ma ngi ki nongshong shnong jong ka Raid kiba tip ïa ki jingeh kiba ngi ïatyngkhuh bad u Syiem. Kiwei kiwei ki kynhun kin ym lah ban wan korbar namarba kim tip eiei,” u la ong shuh shuh.
U Bah Jiedskhem Nongsiej uba dei u dkhot jong ka JAC u la bynrap da kaba kynnoh pyrshah ïa u Syiem Niandro ba u la pyndam wat ïa ka Sanad jong ki Rangbah Shnong ha ka thaiñ Sawsymper. “Kane ka la pynlong ïa ki Rangbah Shnong ba kin kulmar jingmut halor kane ka jingpynmih hukum jong u Syiem. Halor kane, ngi pynpaw ka jingpyrshah ïa u syiem,” u la bynrap.
U Chairman ka JAC u Bah Gilbert Kharraswai u la kyntu ïa ka District Council ba ka dei ban shimkhia mardor ïa ka jingujor jong ki khun ki hajar ka Hima pyrshah ïa u Syiem Niandro Syiemïong.
