Shillong, K’lyngkot, 09: U Lyngdoh Sad jong ka Jylla Niam Bah Shillong Most Rev Victor Lyngdoh ha ka sngi Baar u la phah ïa u kyrwoh sha ki Lyngdoh, ki Riewniam bad sha ki parabangeit ban pyntip halor ka jingplie ïa ki Parish ba thymmai hapoh kane ka Jylla Niam Bah Shillong.
Ha u kyrwoh, u Archbishop Victor Lyngdoh u la pyntip ba ki Parish ban sa plie thymmai1ba kynthup ïa ka Mawiong, Mawtawar, Umpling, Nongrah bad Madanrting.
“Ha ka jingïaid lynti jong ka Balang, ngi ïohi ïa ka jingdonkam ban sumar ïa ka jingim mynsiem jong ki parabangeit ha ki jaka ba bun jong ka Jylla Niam Bah. Ngi ainguh ïa u Blei na ka bynta ka jingïaid shaphrang jong ka Balang ha kane ka Jyllaniam Bah Shillong. Katba ka Balang ka nangroi, ka don ka jingdonkam ban sumar ïa ka jingim mynsiem jong ki parabangeit ha ki jaka babun jong ka Jylla Niam Bah,” la ong u u Archbishop Victor Lyngdoh ha u kyrwoh.
“Ngi da sngewnguh shikatdei eh ïa ki Lyngdoh, ki Riewniam, ki Nongtrei Balang bad ïa ki parabangeit baroh kiba la aiti met bad mynsiem ban pynïaid shaphrang ïa ka Balang Bakhuid jong U Blei. Ka dei ka jingduwai bad ka jingangnud jong kiba bun ban plie ïa ki Parish ha kylleng ka Jylla Niam Bah na ka bynta ka jingsumar ba kynja mynsiem. Ka bynta banyngkong jong ka jingpynroi ïa ki Parish kan sa ïaid shakhmat.
Da ka jingngeit ha u Blei, mynta ka sngi, ka 9 tarik Kyllalyngkot 2024, ngi la don ka jingïalang bad ki dkhot jong ka Council (Jyllaniam Bah), ki Parish Priest (Mawlai & Nongthymmai) bad ki Rangbah Balang ha kaba ngi la rai ban plie ïa kine ki Parish. Nga kyrpad ïa phi baroh ban duwai kyrpang katba ngi dang pynkhreh ïa ka jingplie paidbah ïa kine ki Parish thymmai,” la pynkut u kyrwoh.
