Tura, K’lyngkot 15 : Ka janmiet ban sah kynmaw pateng la pakit hadien ba ka President jong ka ri ka Droupadi Murmu ka la plie ia ka pyrda jong ka lympung ialehkai 5th Meghalaya games 2024 ha PA Sangma Stadium kaba Tura, West Garo Hills District.
Watla ka janmiet ka long kaba khriat hynrei kane kam shym ka theh umpjah satia ia ka mynsiem ki 3000 ngut ki khun samla kynthei bad shynrang na baroh kylleng sawdong jong ka Jylla kiba la ialum lang ban sei madan ia ki sap ba nylla ka jong ki.
Haba kren kum ka kongsan, ka President ka pynpaw ia ka jingkmen ba kan ioh ia kane ka kabu ksiar ban plie ia ka pyrda jong kane ka lympung kaba la ai kyrteng ha ka nam bad ka burom ka jong u PA Sangma, uba la long u Myntri Rangbah bad kumjuh kum u Speaker barim jong ka Lok Sabha bad uba kylla long u Speaker ba nyngkong eh na ka thaiñ shatei lammihngi.
Ka President ka la ban jur ia ka jingdonkam ban kyrshan bad ban ai mynsiem ia ki samla riewlum ba don sap khnang ban saiñdur ia ka jingim ialehkai kaba pura ka jong ki.
Kumta ka kyrmen ba ka lympung Meghalaya Games kan long kaba ai mynsiem ia ki khun samla nangta ban phrang ia ka mynsiem iakhun bad ruh ban wanrah ia ka jingkiew jong ka sports ha baroh ki liang.
Na ka liang u Myntri Rangbah ka Jylla u Conrad K Sangma u la ai khublei ia ka President kaba la lah ban iadon lang ha kane ka janmiet ban plie ia ka pyrda jong kane ka lympung kaba long ruh ka sien kaba nyngkong ba kat ka nongialam ba hakhlieh duh jong ka ri ban iuhkjat ha sorbah Tura na ka bynta ban plie syndon ia kane ka lympung ba heh tam ha ka Jylla.
Shuh shuh u Myntri Rangbah u la ong ka jingpynlong ia kum kane ka lympung ym dei ba la shu pynlong hynrei ka dei kaba ka sorkar ka bet ia u symbai ha ki pateng ki ban wan da kaba plie lad ia ki ba kin sei madan ia ka sap kaba ki don ha ka liang jong ka sports.
“Ha kine ki ar samoi ka jinglong Myntri Rangbah ngi la lah ban tei ia kiba bun ki jaka ialehkai bad ngi khmih lynti ha kine ki san snem ki ban wan ngin dangiai bteng ban pynurlong ia ki jaka ialehkai bapher bapher ha ka Jylla hi baroh kawei.”
“Nga ai khublei ia baroh ki dkhot jong ki komiti treikam bapher bapher kiba la duh dem duh thiah tang namar ban trei shitom ban pynlong ia kane ka lympung kaba jop.”
Ha kawei pat ka liang u Myntri ka tnat Sports and Youth Affairs u bah Shakliar Warjri u la ong, “Nga ieng hangne hakhmat jong phi kum u Myntri jong ka tnat Sports, da ka mynsiem kaba rhem ban iohi ia ka jingsdang jong ka 5th Meghalaya Games, kaba ka jingpynkhreh ia ka, ka la wan na ki jingiatrei lang jong baroh ki shnat treikam sorkar, ki volunteer bad ki khynnah ialehkai kaba long ka thaba kum ka dongmusa jong ka Olympics kaba tehsong ia baroh ki kynhun jait bynriew na ka bynta ban tehsong ia ka Jylla baroh kawei.”
Ha kane ka jingialang la ioh ia ka kynrtien pdiang burom na ka MP ka Tura Parliamentary Constituency ka Agatha K Sangma, ka jingkren na u Lat ka Jylla u Phagu Chauhan.
Hadien kane ka la don ka jingiaid ban pynithuh ia lade da ki samla kynthei bad shynrang na baroh ki district jong ka jylla ba la wan ban iashim bynta ha kane ka lympung bad bynrap da ka jingshad tynrai jong ki paid Garo, Khasi bad Jaintia ne ka shad Wangala, shad Mastieh, shad pliang.
