Shillong, Jymmang, 08: Ki Pulit jong ka East Jaiñtia Hills kiba la trei borbah miet la bad sngi ban iakhun thma pyrshah ia ka jingwan rung u drok shapoh ka Jylla Meghalaya, hapoh shiphew sngi ki la ioh ban kurup ia u drok ba shongdor haduh 15 klur tyngka.
Ha ka step sngi Balang, ki Pulit ka Lumshnong Out Post katba ki dang pynlong ia ka jingtalasi ia ki Bos Night Super ki la ioh kurup ia u drok na ki lai ngut ki nongleit jingleit kiba shong ha ki ar tylli ki Bos Night Super kiba mih na Silchar, Assam ban leit sha Guwahati.
Na kine ki lai ngut ki nongleit jingleit, ki Pulit ki la ioh kurup 40 tylli ki synduk sabon ba la thep ia u drok Heroin ba shongdor T. 3.6 klur, 9.031 kilo u Ganja bad 4 tylli ki Mobile Phone.
Ia kine ki lai ngut kiba la shah kem ha ki Pulit bad ba la register hapoh ki kyndon jong ka NDPS Act la ithu kyrteng kum u Amzad Hussain Laskar, 18 snem ka rta uba sah ha ka shnong Rajnagar, Cachar, Assam, u Monib Hussain Basker 18 snem ka rta uba sah ha Bangram, Cachar, Assam bad u Chamir Hussain Barbhuiya uba sah ha Silchar, Cachar, Assam.
Kane ka dei ka jingioh kurup drok ba bun tam ha ka sien kaba san tang hapoh shiphew sngi, la iathuh ki Pulit.
