Shillong, Nohprah, 03: Ka Shillong College Central Library, Shillong ka la pynlong ïa ka jingïathir ïatai sani kaba saw sngi ha u bnai baladep halor ka ka phang, “Beyond books: Unveiling the Digital Realm” na ka bynta ki samla kiba dang pule ha ka First Semester.
Ka jingthmu ba la pynlong ïa kane ka jingïatai ka long ban pynsngewthuh ïa ki samla pule ïa ka jingïaid stet jong ka por ba la donkam ïa ka Digital nalor ki kot pule bad ban pynsngewthuh ruh ha ki ïa ka bynta jong ka New Education Policy (NEP), ba ka College ka la thmu ban ai jinghikai sha ki samla pule katkum ka jingdawa jong ka por ban pyndonkam ïa ki teknoloji.
Ha kane ka sngi, la ai jingkren da u Vice Principal jong ka Shillong College u Bah Badondor Syiem u la pynpaw ba ka thong jong ka Library ka long ka shlem pule kaba kongsan bha, bad kyntu ruh ïa ki samla pule ban pyndonkam hok ïa ki tyllong jingtip ba ki ïoh na ka Library.
U Vice Principal u la kyntu ruh ïa ki samla pule ba kin phaikhmat da kaba pyndonkam ïa ka Digital khnang ban ïoh ïa ki tyllong jingtip kiba kham thikna.
La ai jingpynshai shuh shuh sha ki samla pule da ka Librarian jong ka College ka Kong B. Lyngdoh. Ka la pyntip ruh sha ki samla pule ba ki tyllong jingtip ki don da ki hajar bad ki phew hajar tylli lyngba ka e-resources.
Ka la pyni nuksa ruh kumno ban pyndonkam ïa ka e-reader apps bad ïa kiwei pat ki rynsan, kaba pynshlur ïa ki samla pule ba kin nang kumno ban pyndonkam ïa ka e-resources kaba la don lypa la ka long na ka College lane na kiwei pat ki bynta.
