Shillong, Jymmang 01: Ka Khasi Students Union (KSU) East Jaiñtia Hills District Unit ha ka sngi Balang ka la pan jingshai na u Deputy Commisisoner jong ka East Jaiñtia Hills District u A. Baranwal halor ka jingpynkynriah ïa ka Check-post ki shipai BSF ha Sonapyrdi.
Ha ka sngi Baar, u DC u la khot ïa ki heh shipai BSF halor kane ka mat.
Kum ban shu pynkynmaw ba ka jingkhot ïakren ka dei hadien ba ka seng bad ka shnong Sonapyrdi lem bad ki paidbah na ki thaiñ Huroi, Hingaria, Lejri, Myrli bad kiwei kiwei ki lah mih paidbah ban pynpaw ka jingpyrshah kaba jur haba don katei ka ktem ha ka 26 tarik u bnai ïaïong 2024.
Haba ïakren bad ïoh jingshai na u DC u la ong ba ka jingïakren ka long kaba seisoh bad hapoh kine ki sngi yn pynmih ïa ka hukum ban kynriah noh ïa ki mar mar. Ka seng ka la suba ruh ba ka lah ban don ka jingbym kohnguh ïa ka order u DC ynda la pynmih hynrei ka seng ka la kyntu ba ïa kane ka mat ym tang ban shu pynsngewbha ïano ïano da kaba shim rai kyrkieh hynrei dei ban ïakren haduh ba kan urlong syndon.
Ka seng ka maham ruh ban ïamih paidbah biang lada jia ba ki BSF kim treh ban kynriah bad lada ki bteng ka jingleh heh bad ktah kti ïa u paidbah.
Kum ban shu kynmaw biang ka seng ka la ïaid lynti ïa kane ka mat ban dawa beh ïa kitei ki BSF la jan 6 snem mynta ha kaba naduh ka shnat treikam ka seng ka KSU Sonapyrdi unit, ka KSU Narpuh Circle tad haduh ba hap ban mih paidbah hapoh ka jingïalam ka KSU EJHDU.
Ka seng ruh ha ka 18 tarik u bnai Nailur 2023 ka la pynsngew shaduh ka miej jong u myntri ba dei peit ïa ka Kam Pohïing u Bah Prestone Tynsong hynrei khlem don kano kano ka jubab na ka sorkar halor kane.
“Ka jingdawa jong ngi hi ka long ba ngim dei ban ïohi shuh ïa ki BSF ha katei ka jaka bad ha Dona Umbluh hajan Ratachera. Kyntang ïawai ka seng ka pynpaw ïa ka jingsngewnguh ïa ka bor district kaba la shimkhia ban khot ïakren bad ki BSF bad kyrmen kan long kaba seisoh haduh ba kut khlem ki jingthud. Ka seng kan ïai buddien halor kane ka mat ha ki sngi ban wan,” ong ka KSU.
