Shillong, Jymmang 01: Ka KSU East Jaiñtia Hills District Union (EJHDU) ha ka sngi Balang ka la ujor sha u Deputy Commissioner jong ka East Jaiñtia Hills u A. Baranwal pyrshah ïa ki karkhana pynmih dewbilat halor ka jingbym pynmih ïa ki khubor lait kam (Advertisement) ha ki lad pathai khubor ha jylla Meghalaya ba manla ka por.
Ka seng ka lap ba kiba bun ki kam kiba lait ha kine ki karkhana la pyllait sha kiwei pat ki kot khubor kiba dei na kiwei pat ki jylla kum sha Bihar, Assam bad kiwei kiwei.
Kane ka jingleh jong kine ki karkhana ka pynbitar ïa ka seng bad ka pyni ba kim burom bad kheiñ snep satia ïa ki trai ri trai muluk ha ka liang ka ïohkam ïohjam.
“Kane ka jingleh kine ki karkhana pynmih dewbilat ba don ha ka thaiñ East Jaiñtia Hills District hi baroh kawei ka pyni shai ba ki kwah tang ban kjit ïa ka spah mariang ka jong ngi khlem da sngewlem tang khyndiat ruh ïa ki bapli ki samla jong ngi kiba la pyndep ïa ki kyrdan pule bapher bapher bad kiba long tbit (Qualified) ban trei ha kata ka kam kaba dei hi ka laiñ pule jong ki,” ong ka KSU.
Ka seng ka dawa na u DC bad la kyntu ba ki dei ban tuklar ïa kane ka kam bad kim dei ban ïaid lait ban pynmih ïa kano kano ka kam ha ki lad pathai khubor ka jylla.
Ka seng ha kane ka sngi ka la pynpaw ruh ba kan sa wanrah ïa ka job fair ha ka thaiñ East Jaiñtia ha kaba kine ki karkhana kin hap ban thep kam ïa ki samla ka thaiñ ryngkat ka jingïatreilang bad ka bor district lada long kaba lah.
Haba ïakren halor kane ka phang, u DC u la ong ba un ai da ka jingthoh sha baroh ki cement plant ba don hapoh district ban ïakren ïa kane ka kam.
