Shillong, Lber, 25: U Symbud Myntri Rangbah ka jylla Bah Prestone Tynsong uba dei ruh u State President jong ka National Peoples Party (NPP) u la buh jingkylli ia kito kiba ju kynthoh da kaba ong, “hato naduh ba ka National Peoples Party ka la bat ia u lakam synshar hapoh ka jylla Meghalaya naduh u snem 2018 haduh mynta u snem 2024 ka la ju don neem ka jingpynthud bad ka jingkhang ban mane Blei laitluid hapoh ka Jylla Meghalaya.”
Ha ka jingiakren bad ki lad pathai khubor ha ka Lah Sngi u Blei, u Bah Prestone u la ong ruh ba ka nongrim jong ka NPP ka long ban iada ia ki ritpaid bad ban pynneh pynsah ia ka riti ka dustur, ka jingngeit bad ka niam ka rukom.
Kane ka jingpynshai jong u Bah Prestone ka long hadien ba ka la mih ka jingkynnoh ba ka BJP bad ka NPP ki dei hi kajuh ka party tang hadien ar sngi eiei ba ka High Command jong ka BJP ka la shim ia ka rai ban ym pynieng kyrtong satia ha Meghalaya hynrei ban kyrshan ia ki kyrtong ba la pynieng da ka NPP ba kynthup ia ka Dr. Ampareen Lyngdoh ka ban iakhun na Shillong Parliamentary Seat bad ka Agatha Sangma na Tura Parliamentary Seat.
“Ka jingkynnoh ba ka BJP ka dei ka NPP bad ka NPP ka dei hi ka BJP kam dei shuh kaba dang mynta hynrei ka dei kaba la jia mynta la bun tylli ki snem. Naduh u snem 2018 ha ka por ba ka NPP ka la sdang ban khie rasong bun bah ki jingpyntieng pynsmiej ba wat thep ia ka NPP namarba ka NPP ka dei hi ka BJP bad ynda ki la jop bad khamtam ynda ki ioh ban synshar ia ka Sorkar kin khang wat ia ki ingmane ruh bad kin ym shah wat ban pynlong ia ka jingmane Blei,” la kynthoh u Bah Prestone.
“Kata ka dei ka jingkynnoh ha kato ka por. Hynrei lada phi phai kaei kaei kaba jia, u Blei uba stad, namar hadien ba ngi la ioh ban synshar naduh u 2018 haduh u 2023 nga kwah ban kylli ia kito ki nongkynnoh hato don mo ka por ba hapoh ka jingialam ka NPP ia ka Sorkar ka don mo kata ka jingpyrkhing, ka jingkhang, ka jingpynwit, ka jingpynthud ia ka jingmane Blei,” la buh jingkylli u State President ka NPP.
“Ngi ieng ha ka nongrim ba ngin iada ia ki ritpaid bad ngi kwah ban pynneh pynsah ia la ka jong ka riti ka dustur, ka jingngeit bad ka niam ka rukom. Mynta ka kynti ka jingkynthoh jong ki babun balang ka long ba ka NPP ka mut ka BJP, ka BJP ka mut ka NPP hana namarba ka High Command jong ka BJP mynshi sngi ka la rai ban kyrshan ia ka NPP ha Shillong bad ha Tura Parliamentary Constituency,” u la ong.
“Ngi pdiang sngewbha ia ka jingkyrshan ia ki kyrtong ka NPP ka bym don ruh ka jingbuh kyndon hangno hangno ruh. Ngi lyngngoh hapoh ka Jylla namarba ma ki (kyrtong) ruh ki la pan tiket na Shillong bad na Tura bad ngi nang pyrkhat ba la kumno kumno ruh ka BJP kan ialeh beit,” ong u Bah Prestone bad bynrap, “ia kata ngi ieh ha ka jingstad jong ki (BJP) lehse ka jingpyrkhat jong ka High Command (ka BJP) ka long kaba bha tam namarba ka NPP ka iatreilang hapoh ka National Democratic Alliance (ba la ialam da ka BJP).
“Ha North East, lada phi ong ha Manipur ngi kyrshan ia ka MNF bad ha Nagaland ngi kyrshan ia ka NDPP ba ialam da u Neiphu Rio namarba ki don lang hapoh ka NDA,” la pynshai u Bah Prestone.
“Ngim dei ban sngewthuh bakla haba ngi ai jingkyrshan ba ka riti treikam jong ka party ba ngin weng noh ia ka, em. Kane ka nongrim jong ngi, kane ka tien phira jong ngi, ki agenda jong ka party NPP ka long ban iada, ban pynneh, ban pynsah ia ka riti dustur, ia ka niam ka rukom, naduh ka jingngeit bad ka jingmane Blei ki ritpaid ym tang ha Meghalaya hynrei ha baroh kawei ka ri India,” la bynrap shuh shuh u Bah Prestone.
U ong ruh ba kum kine ki jingkynnoh ki ju jia bha ha ki por elekshon. “Nga kyrpad ia ki paidbah nongthep vote ba ki dei ban pynshong nongrim bad kim dei ban shu ngeit ia kum kine ki jait jingkynnoh kiba mih tang ha ki por elekshon,” la kyrpad u State President ka NPP.
