Shillong, Lber, 25: Tang hapoh ar sngi ba ka BJP ka la pynbna paidbah ban ym pynieng kyrtong ha Meghalaya ha ka elekshon Lok Sabha ka ban sa long ha ka 19 tarik u Iaiong, 2024, ki nongkyrshan jong ka BJP na Ranikor Constituency, South West Khasi Hills District ha ka Lah Sngi u Blei ki la mih shakhmat ban pynpaw ba kin ai jingkyrshan bapura ia u kyrtong ka Congress u Bah Vincent H. Pala.
Ka jing ai jingkyrshan jong ki nongkyrshan ka BJP Ranikor Mandal ka dei ruh lyngba ka jingai jingbit bad ka jingiasngewthuh lang bad u MLA barim u Martin M. Danggo.
Ki nongialam ka BJP na Ranikor kiba la wan sha kane ka jingialang ki kynthup ia u Bah German Nongsiang, Bah Manstudy Nongrem uba dei u CEM barim jong ka KHADC lem bad kiwei kiwei.
Shuh shuh, tang hadien ar taiew eiei ba u MDC ka Congress na Mawkyrwat u Bah Carnes Sohshang lem bad ka kynhun ki la pyniasoh ialade bad ka NPP, mynta ka Lah Sngi u Blei ka sem jong ka Congress ha Mawkyrwat Constituency ka la syaid biang hadien ba u kyrtong ka HSPDP ha ka ilekshon MLA ba ladep u Bah Medalsing Lyngdoh lem bad ki nongkyrshan jong u ki la pyniasoh ialade sha ka Congress ha kaba la pdiang sngewbha ia ki da u President ka Meghalaya Pradesh Congress Committee (MPCC) Bah Vincent H. Pala.
Nalor ki nongkyrshan ka HSPDP bad BJP, la sakhi ruh ia ka jingpyniasoh jong u Vice President ka All India Trinamool Congress (AITC) ka Mawkyrwat Block Bah Kordor Kharlyngdoh bad ka kynhun jong u sha ka Congress.
