Shillong, Lber, 25: U Vice President ka North Eastern Hill University Students Union (NEHUSU) u samla Estherson Sohtun u la shah ktah kti bad shah shoh ha ka Lah Sngi u Blei ha ki briew ki bym dei ki trai jylla kiba lehkmen Holi hajan ka pung kaba don ha phyllaw jong ka skulbah NEHU, Shillong.,
Marmar hadien kane ka jingjia, u Vice President ka NEHUSU u la ujor da ka ejahar sha ki Pulit jong ka Mawkynroh Out Post ba kin pynlong ia ka jingtohkit kaba bniah halor kane bad ba kin kem ia kiba donkti.
Ha ka jingiakren bad ki lad pathai khubor hadien ba ladep leh ia ka Medical Check-up ha Civil Hospital, Shillong une u nongialam ka NEHUSU u la iathuh ba kane ka la jia ha ka por 12:30 baje mynsngi.
U la iathuh ba ha ka jingiashoh, u la mong na ki bynta ki kti bad ka met bad nalor kata wat ka sopti phong jong u ruh ka la kad.
“Nga sah beit ha (Hostel) NEHU bad nga dei ruh u Vice President ka NEHUSU. Dang step tang shu khie u telephone u nonghikai bad leit ai khublei Holi ia u. Tang dep nangta nga wan nga (iohi) ba don hajan ka pung (ha NEHU) ba don ka jingleh kmen bad ba wah ia ka Banner lehkmen Holi. Ngim don jingujor eiei ia ka jinglehniam Holi jongno re jongno, ka (ri India) dei ka ri ba ai laitluid ia ka jingmane Blei, ki bun ki jaidbynriew lane ki niam ki bapher bapher bad ki jinglehniam jongno jongno ngim ju pyrshah,” ong u samla Sohtun.
“Hynrei haba ngi leit peit hangto (hajan pung) ngi iohi ba don katto katne ki bym dei ki khynnah pule ha NEHU khamtam ki don katto katne ngut kiba dei ki nongialam jong ka Akhil Bharatiya Vidyarthi Parishad (ABVP). Ngi khlem leit da ka bor bad ngi khot da ki Security incharge ba kin leit iakren ban ym leh politik ha NEHU lyngba kine ki jinglehkmen,” u la ong.
“Katba ngi dang leit iakren, u ong pynban ba ki Khasi ki pyrshah ia ka Holi, ki kwah ban shna ishu ha ka jingiapher jaitbynriew hapdeng ki Khasi bad kiba na Rithor bad don kiba ring video ban pynheh ia kane ka ishu nga knieh ia ka mobile phone jong u khynnah. Hadien ba nga knieh ia ka mobile phone ki thombor ia nga,” la iathuh u samla Sohtun bad ong iathuh shuh shuh ba ka la mih ruh ka jingiapyni bor hapdeng jong u bad ki nongialam ka ABVP na NEHU.
“Ia kiba (pule) ha NEHU ngim don kano kano ka jingujor bad baroh ki lah ban rakhe ia kano kano ka jinglehniam hynrei ki briew hi kiba wan nabar ban leh politik ha NEHU ngim ailad daleilei. Ngi khlem leit ban pynsangeh ioh ka jia ka jingkulmar,” ula ong.
“Ban iashad ia lehkmen ngim don jingujor hynrei ban leh trai da ki briew kiba nabar hapoh kane ka ri ka muluk jong ngim ngin ym ailad,” u la ong bad bynrap, “ngim pyrshah ia kano kano ka seminar na ka NEHUSU hynrei kumba la leit ha kato ka sngi da ki nongialam ka HYC ki pyrshah ia ka jingwan jong ka RSS.
Haba kylli u la iathuh ruh u la jer kyrteng ha ka ejahar ia ki briew kiba dontki ban ktah kti ia u
