Shillong, Lber, 25: Ki lama thok ba la shna ha ka dur jong ka seng sain pyrthei Voice of the People Party (VPP) ka bym don satia wat tang ia ka shab jong u Prah ba shu thoh da u Marker Pen la teh da ki briew bym lah ban tip ha ka kynroh jong ka Civil Hospital Shillong.
Ia kine ki lama thok ba shu shna tang ban pynthohbria ia ka Voice of the People Party (VPP) ba la teh ha kynroh kane ka hospital, hadien ba la treikam ka Model Code of Conduct (MCC), la lap ha ka step Lah Sngi u Blei katba u nonglum khubor u dang iaid lynti nakhmat ka Civil Hospital, Shillong.
Ia kine ki lama thok la lap ba la weng noh da ki bor synshar district tang hapoh katto katne por.
U Nongaiktien jong ka VPP Dr. Batskhem Myrboh ha ka jingiakren bad u nongthoh khubor u la pynshai, ba kine ki lama thok kim dei satia kiba la phah teh da ka VPP bad ong ba kane ka dei ka jingleh jong ki briew kiba ka party kam lah satia ban tip.
U la ong ruh, halor kane ka VPP kan sa ujor sha ki bor pyniaid jong ka tnat Elekshon ka jylla ha kaba iadei bad ka jingpyrshang jong ki briew ban pynthohbria ia ka party khamtam ha kum kane ka por ba ka Model Code of Conduct (MCC) ka dang treikam ha baroh kawei ka ri India namar ka jingdon jong ka elekshon Lok Sabha ka ban sa long ha ka 19 tarik Iaiong, 2024.
