Shillong, Jymmang, 21: U District Magistrate jong ka East Khasi Hills District u SC Sadhu u la pynmih da ka hukum ha ka Lah Sngi u Blei kaba bthah ia u Syiem jong ka Hima Sohra ban plie noh mardor ia ka surok na Umdud sha Zero Point hadien ba u Syiem u la phah khang khyrdep ia kane ka surok.
Ka jingphah khang jong u Syiem ka Hima Sohra ia ka surok Umdud sha Zero Point ka long hadien ba u District Magistrate jong ka East Khasi Hills District u la pynjari da ka Section 144 CrPC ban phah khang khyrdep ia ka khyrdop khrong bai musur ba la aiwai da u Syiem ka Hima Sohra.
Ha ka hukum u District Magistrate u la ong, “hadien ba la ioh jingtip ba ka don ka jingkhang khlem da ioh jingbit ia ka surok na Umdud sha Zero Point Road da u Syiem jong ka Hima Sohra kaba la wanrah ka jingkhang khyrdep ka jingshalan mar lyngba ka Majai Land Custom Station, u District Magistrate, East Khasi Hills District ha ka hukum ba la pynmih ha ka 20 tarik, Jymmang, 2024 ula pyntip ba ia ka jingkhaii lyngba ka Majai Land Custom Station dei ban sdang noh mardor.”
“Ka hukum ka kdew ruh ba kino kino kiba pynkheiñ kin shah pynshitom katkum ki kyndon jong ka aiñ,” ong ka hukum na u District Magistrate ka East Khasi Hills District.
