Ribhoi, Lber 26 : Kum shi bynta ban wanrah ia ka jingiajan bad ia ithuh ithaw para samla pule Khasi, ka KSU RIST USTM Unit ha ka 25 Lber 2024 ka la pynlong ia “Ka 1st University sports meet 2024” ha kaba ki lai tylli ki skul bah hapoh ka Ri Khasi ba kynthup ia ka KSU North Eastern Hills University Unit, ka KSU Mahatma Gandhi University bad ka KSU RIST- USTM unit ki la ia snoh kti lang ha kane ka Lympung.
Ha kane ka sngi la don ki jingialehkai bapher bapher naduh ki football, volleyball, Basketball bad kiwei kiwei. Ha kane ka jing ialehkai kaba la sdang naduh ka por 8 baje mynstep la plie pyrda da u samla Johny Nongrum Sports Secretary KSU NKHD Unit , bad ha ka por 3 baje janmiet la pynhap pyrda noh da u samla Donald V. Thabah, General Secretary KSU CEC ha ka jingiadonlang u samla Rapbor Nongrum Ex Finance Secretary KSU CEC ,u samla James H Mawphniang General Secretary KSU NKHD Unit lem bad kiwei kiwei.
Haba ai jingkren na ka liang u samla James Mawphniang u la iathuh ba kiwei ki Jaitbynriew ki ju iatynjuh bor shabar jylla na bynta ka ioh kam ioh jam kumta u la kyntu ia ki Samla Pule Khasi ruh ba kim dei ban shu ap tang ia ki kam ki jam hapoh jylla lajong hynrei ki dei ban ialeh ban iatynjuh bor bad kiwei pat ki jylla da kaba leit wad kam wad jam sha kiwei pat ki jylla khamtam ban apply ia ki Central Recruitment kum ki Civil Services bad kiwei kiwei. Na ka liang u Samla Rapbor nongrum u la ai mynsiem ia ki samla pule jong ki lai tylli ki skulbah ba dei lyngba kine ki jait program ba ka Seng ka ju ai mynsiem barabor ia ki samla pule ban iajuh iajan ha man ki bynta bad khamtam ynda haba ki la pyndep ia ki jingpule kin bteng ia ki jingpule ne ki kam ki jam sha kiwei pat ki bynta lane shabar ka jylla hynrei kim dei pat ban klet ia la ka jong ka thymmei kaba ki don naduh ka ktien ka thylliej ka riam ka beit ka akor ka burom .
Na ka liang u Samla Donald V. Thabah General Secretary ka KSU CEC u la pyn kynmaw ba ha u 25 tarik u Nailur 2019 u la pynskhem nyngkong ia ka KSU RIST-USTM Unit la pynskhem hapoh dukan sha bad dei hadien 4 snem pat ba u la wan biang ban pynhap pyrda ia ka KSU Sports Meet jong ki lai tylli ki skulbah ha kaba ki la ioh pat ban pynlong ia ka program kaba heh hapoh ka kamra jong ka RIST-USTM, dei lyngba ka jing iaï shah bad ka jingtrei shitom la ioh pat ban long trai mynta ha ki University bapher bapher, u la pynkynmaw ruh ialade ha ka por ba u dang dei u samla pule jong ka skulbah NEHU lyngba ka shnat trei kam ka KSU ha ryngkat ka jingdonlang bad u samla Lambok Marngar ki la lah ban pruid dak ia kiba bun ki jingdonkam kiba hap ban pynkylla ia ki jing thoh ha ka ba iadei bad ki jing donkam ha katei ka skulbah ban pynkylla ia ki kyntien nongwei sha ki kyntien trai Ri .
