Shillong, Lber, 26: Ki Pulit ka Rani Border Outpost ha ka sngi baar ha ka por kumba 9:30 mynstep ki la ioh jingtip ba ki don ki runar kiba kieng atiar hajan ka shnong Ranibari.
Tang shu ioh jingtip halor kane, u In-Charge jong ka Rani Border Outpost ryngkat ki nongtrei jong u mar mar ki la leit kthong ia kine ki runar. Tang shu iohi ia ki Pulit, ki runar ki la synreit kuli hynrei na ka liang jong ki Pulit kim shym la pynphai kylla namarba ki don ki khynnah bad ki kynthei hajan kane ka khlaw.
Ha ka jingbeh thong, ki Pulit ki la iohkem ia ki arngut ki runar kiba la ithuh kyrteng kum u Ajit Rabha uba la 18 snem ka rta bad ka Kavita Rabha kaba la 18 snem ka rta.
Ha ka jingtohkit, kine ki arngut ki la phla ba ki dei kiba ju donkti ha ki kam runar ba la pyntbit bha ialade ha ka kam tuh kam thiem, kynthup ruh ban ot tuh ia ki Dieng Sal, ban tuh ia ki thuk thuk ar shaka bad ban tuh ia u kwai na ki bri ki bsah. Nalor kata, ki Pulit ki la lap ksai ruh ba u nongialam jong kane ka kynhun ki runar u dei u Panah jong u Ajit Rabha, ia uba la tip kyrteng kum u Rudra Rabha.
Ki Pulit ki la ioh ban kurup ruh ia kawei ka suloi SBML bad u gunpowder ha ka jingkhynra ia ka ingsah jong u Ajit Rabha.
Ki Pulit jong ka Ri-Bhoi haduh mynta ki dang pynlong ka jingkhynra ha kane ka khlaw hajan ka shnong Ranibari ban iohkem ia ki dkhot jong kane ka kynhun ki mentuh.
Ha kaba iadei bad kane, ki Pulit ki la rejigster case ha Khanapara Police Station hapoh ki kyndon jong ka ain ba iadei bad kane ka jingjia.
