Shillong, Lber 31: Ka eriong kaba jur kaba wanrah lang ia u lapbah bad ia u phria ka la syllad ia kiba bun ki bynta jong ka thain ribhoi sepngi khamtam ha ka thain Jirang kaba la mad ia ka jingjurlor na ka jingshah rat ki tnum iing bad ka jingjulor jong ki jingthung jingtep.
Katkum ka jingtip ba la ioh lum, la iathuh ba ka shnong Umsaliang bad ka shnong Umsalani ki dei ki ar tylli ki shnong kiba la shah ktah jur bha haduh ba kawei ka longkmie kaba la tip kyrteng kum ka Khuni Killing ka la mynsaw jur ha kane ka jingjia bad kumba 44 tylli ki longiing ki la shah ktah.
U Block Development Officer ka Jirang C&RD Block u Dr. Pabitra R Hajong ha ka jingiakren bad u nonglum khubor u la pyntip ba kane ka la jia ha ka por kumba 4 baje eiei janmiet jong ka 31 tarik u Lber, 2024 kat haduh ba ki iing ki sem ki la shah rat lut bad ki dieng ki la khyllem ha surok bad kah ruh ïa ka lynti ïaid.
Na ka liang jong u BDO lem bad ki Pulit jong ka Rani Border Out Post ki la leit mar mar sha kane ka jaka hynrei ki la sahkut ha lynti namar ka jingkhyllem jong ki dieng hapdeng surok.
U BDO u la bthah ruh ïa ki nongshong shnong ban rieh shipor ha ki iing skul bad ha ki iing dorbar kiba don ha kane ka shnong khnang ban lait na u slap bad na ka lyer katba ka Sorkar ka dang pynkhreh ia ki lad jingïarap.
Kat haduh ba la pynmih ia kane ka khubor, la ioh jingtip ruh ba ki dang don sa kiwei kiwei ki shnong kiba shah ktah jur ha ka jingsyllad ka eriong bad ka jinghap jong u phria kum ha ka shnong Nongrim Jirang.
