Shillong, Lber, 01: Ka Hynñiewtrep Youths Council (HYC) Sohiong Circle ha ka sngi Thohdieng ka la pynsngew sha ki tyndong skhor jong ka Sorkar Jylla halor ki jingeh bad ki jingduna kiba iadei bad ka Sohiong Community Health Centre (CHC).
Ki dkhot ka seng ba la lamkhmat da u President u Bah Purningstar Shabong ki la pynsngew ia kine ki jingduna jong kane ka jaka ai jingsumar ha ka Myntri ka Koit ka Khiah ka Dr. Ampareen Lyngdoh.
Ha ka jingiakren bad ki lad pathai khubor hadien ka jingiakynduh ia ka Myntri, u Bah Shabong u la iathuh ba ka seng ka la pynsngew hakhmat ka Myntri ia ka jingud jingnam jong ki paidbah nongshong shnong ka thaiñ Sohiong sha ka seng halor ka jingleh torti bad ka jingbym shimkhia jong ki nongtrei ka CHC kynthup ïa ki Nurse bad ki Doctor.
“Katkum ka jingujor ba ngi la ïoh na ki paidbah, ki nongtrei ka CHC bunsien ki ju kyntait ban sumar ïa ki nongpang bad ki bthah ba kin leit sha kiwei pat ki jaka sumar watla ka dei tang ka jingpang kaba rit. Nalor kata, katkum ka jingujor jong ki paidbah, ki nongtrei ha kane ka CHC ki ju mlien ban kren heh, kynhied bad kren dukhi ïa ki nongshim dawai bad ia ki paidbah kiba shah sumar ha kane ka CHC. Kane ka jingleh jong ki nongtrei ka la ktah ïa ka jingsngew jong ki paidbah jong ka thaiñ Sohiong hi baroh kawei,” u la ong.
U la kam ruh ba ki paidbah ki ju ud ba ki Doctor bad ki Nurse bad kumjuh ki lad jingsumar kim ju biang ha kane ka CHC.
“Kine ki jinglong jong ki nongtrei ha ka Sohiong CHC bad ka jingbym biang jong ki Doctor bad ki Nurse ka la pynlong ïa ki paidbah jong ka thaiñ Sohiong baroh kawei ban duh noh ka jingshaniah ïa kane ka CHC bad bun na ki paidbah ka thaiñ Sohiong kim banse ban leit wad sumar sha Mawphlang, sha Mairang bad sha kiwei kiwei ki jaka,” la kynnoh u Bah Shabong.
Haba pynksan ïa kane ka jingkynnoh, une u nongïalam ka HYC u la kam ruh ba ka seng ha ka jingleit jurip kyndit ïa ka Sohiong CHC ha ka 14 tarik u bnai baladep ban lap ïa ka jingshisha halor ka jingujor bad ka jing ud jingnam jong ki paidbah ka thaiñ Sohiong, ka la lap shisha ïa ka jingduna jong ki nongtrei bad ka jingkren baheh ki nongtrei kaba long shisha katkum ka jingud jing nam bad ka jing ujor jong ki paidbah na ka por sha ka por.
“Ngi la ïakren bad ka Myntri kaba peit ïa ka tnat ka Koit ka Khiah ba kan shimkhia ïa kane ka jingeh kaba mih ha kane ka CHC Sohiong da kaba bthah ba ki nongtrei ba kim dei ban pyni ïa ka jingdukhi ne lehmeng pyrshah ïa ki nongpang ne ki briew kiba leit wad sumar ha kane ka CHC,” u la bynrap.
U la ïathuh ruh ba ka seng ka la kyrpad ïa ka Myntri ba kan shim khia ban pynbiang ki nongtrei da kaba thung bad thaw thymmai shuh shuh ki Post ba dang duna kynthup ïa ki Doctor, ki Nurse bad kiwei kiwei kiba long katkum ki kyndon ba la pruid dak da ka Indian Public Health Standard (IPHS) khnang ba ka jingshakri jong ka CHC kan lah ban pynjanai.
“Ngi la ai jingmut ruh ba ka tnad ka koit ka khiah jong ka Sorkar ba kan shna noh da u Toll Free Helpline Number kaba long katkum ka jingpruid dak ha ka Section 38 jong ka National Medical Commission Registered Medical Practitioner (Professional Conduct) Regulation 2023 khnang ba kan pynsuk ïa ki paidbah ba kin ujor sha ka State Medical Council ne ka Ethics and Medical Registration Board halor ka jingshah kren/leh tohmet jong ki nongpang ne paidbah ha ki jaka sumar na ki por sha ki por,” u la ong.
Ka seng ka la kyntu ruh ïa ka Myntri ba kan wad ïa ki lad ki lynti ban pynbiang ïa ki tiar ai jingsumar ha kane ka CHC khnang ba kin long ki jingmyntoi ïa ki paidbah bad ban pynkhlaiñ ruh ïa ka jingtreikam jong ka SMC ne ka EMRB khnang ba kan lah ban pynsted bad pynkloi ïa ka jingtreikam haba don ka jingujor na ki paidbah.
