Shillong, Risaw, 04: Lai ngut ki mynsiem briew ki la duhei ia la ka jong ka jingim ha ka jinglynshop jong ki bor ka mariang ia ki lai tylli ki District jong ka rilum Garo ba kynthup ia ka West Garo Hills, ka South West Garo Hills bad South Garo Hills na ka jingther jong u lapbah uba jur ha ka 3 tarik bad ka 4 tarik Risaw, 2024.
Kane ka jingther jong u lapbah uba jur ka la wanrah ruh ia ka jingshlei um bad ka jingtwa khyndew ha kiba bun jaka.
Ki lai ngut ki briew kiba la duhei ia la ka jingim ki dei kiba la tip kyrteng kum ka Santa N. Marak, kaba la 57 snem ka rta na ka shnong Koinabui, i heprit Miardo P. Marak iba la 5 snem ka rta na ka shnong Sorokpara, bad ka samla Sarika M. Marak kaba la 18 snem ka rta na ka shnong Kharongngre.
Katkum ka kaiphod ba la pyllait da ka Sorkar Jylla ha ka 4 tarik u Risaw, 2024 la pyntip ba haduh 17 tylli ki shnong ki la shah ktah bad 2,364 ngut ki nongshong shnong ki donkam ia ki jingiarap ba kyrkieh.
Shuh shuh la pyntip ba bun ngut ki nongshong shnog ki la mynsaw bad la pynkit sha ki jaka ai jingsumar. Napdeng kbua la mynsaw ki long ka Moralistic N. Narak kaba la 28 snem ka rta ba la pynkit sha CHC Dalu, bad ka Parcella A. Sangma kaba la mynsaw na ki bynta jong ka kjat lem bad u Fredrick A. Sangma, kiba dei na ka shnong Northern Hawkhana, kiba dang don mynta ha ka jingshah sumar ha Civil Hospital Tura.
Halor kane ka jingjia, ki Deputy Commissioners bad ki Superintendents of Police jong ki lai tylli ki District ki la peitngor bha ia ka jinglong jingman ban iarap ia ki paidbah da ka jingiatreilang bad ka State Disaster Response Force na Tura bad na Shillong.
Shuh shuh la pyntip ruh ba ka Primary Health Centre (PHC) Silkigre ka la shlei da ka um bad khang lynti ruh ia ki kali bad ia ki nongpang ban rung sha kane ka jaka ai jingsumar.
Tang shu iohi ia kane ka jingjia, ki nongshong shnong ki la mih bam ai jingiarap sei ia ki nongpang bad ia ki nongtrei napoh ka Hospital.
