Shillong, K’lyngkot, 29: Ha kawei na ka jingjia ba sngewsih, uwei u rangbah u la duhei ia la ka jong ka jingim hadien ba u la shah bat ha ka bording ilektrik ha kawei ka jaka kaba don marjan bad ka jingkieng Umiam kaba hap hapoh ka Mawlai Police Station.
Kane ka la jia hynnin ka janmiet sngi U Blei ha ka por kumba 5:30 baje janmiet.
Katkum ka jingtip la iohlum la iathuh ba une u rangbah uba la khlad noh la tip kyrteng kum u Rishanlang Muktieh uba la 25 snem ka rta uba dei na ka shnong Ladlasharai, Ri Bhoi District bad uba trei kum u nongap pahara ha jingkieng umiam.
La iathuh ba ha katei ka janmiet u la leit ban lum dieng thang najan ka jaka ba don u transformer jong ka ITD Cementation India Limited ha Umiam, hynrei khlem poi pyrkhat u la mad pynban ia kane ka jingjia ba sngewsih.
Mar mar la pynkit ia u sha Shillong Civil Hospital hynrei kham hadien u la khlad noh na kane ka sla pyrthei.
