Shillong, K’lyngkot, 29: Ka jingdawa jong ki nongtrei ka EMRI-108 kiba don hapoh ka shatri jong ka Meghalaya EMRI Workers Union (MEMRIWU) ia ka Sorkar Jylla ba kan shimti ban pyniaid hi noh ia ki kali EMRI-108 kam shym la long satia kaba seisoh.
Ha kane ka jingialang ba la pyniaid da ka Myntri ka Koit ka Khiah ka Sorkar Jylla ka Dr. Ampareen, la iadonlang u Mission Director ka National Health Mission u Ram Kumar bad kiwei kiwei de ki ophisar na ka tnat ka Koit ka Khiah.
“Ha ka jingiakynduh (bad ka Myntri) ngi dap da ka jingsngewsih ba kam don kano kano ka jingseisoh namar naduh ba la kut ka jingtreikam jong ka kompeni kaba rim (kaba pyniaid ia ka EMRI-108) ka la kynjoh shi snem watla ka Sorkar ka la panpor tang lai bnai,’ la ong u President ka MEMRIWU Bah Roypar Kharraswai ha ka jingiakren bad ki lad pathai khubor hadien ka jingialang.
U la iathuh ba ka Myntri ka la shu phah wan ia ki nongialam ka MEMRIWU manla u bnai ban iakren ia kajuh shi kajuh khlem da lah satia ban ia pynbeit.
U la iathuh ba ka Myntri ka la phah wan iakynduh biang ha ka sngi Baar jong ka taiew ban sa wan bad shwa kane ki nongialam ka Union kin iakynduh shwa ia u Mission Director ka NHM u Ram Kumar ha ka Lah Sngi u Blei.
U President ka MEMRIWU u la ong ba ka Union kan dawa beit ba ka Sorkar ka dei ban shimti ban pyniaid hi ia ka EMRI-108 namarba ia ka pisa la bei hi da ka Sorkar Jylla bad shispah na ka shispah la shisnem kynthih ki kam ki la iaid beit iaid ryntih.
“Ka Sorkar kam don jingeh jingeh shuh ban pyniaid hi ia kane ka kam namarba wat ka pisa ruh kam wan shuh na ka Sorkar Pdeng,” la ong u Bah Roypar.
Ha kaba iadei bad ka jingsiew tulop, u Bah Roypar u la ong, “naduh ba ka Sorkar ka la pyniaid hi ia ka EMRi-108 ki nongtrei ki shu ioh tang ia ka tulop bad kim don shuh kino ki jingioh jingmyntoi la long kum ka shuti, ka Provident Fund bad ka Health Insurance. Lada ngi kheiñ, ka Sorkar ka la pyndonkam bakla ia ngi. Ngi dawa ia ka Sorkar ba kan pynbeit noh ia kane ka kam.”
U Bah Roypar u la iathuh ba u Mission Director ka NHM u Ram Kumar u la kyntait ban mynjur ia ka jingdawa jong ka MEMRIWU ban pynkiew ia ka jingsiew tulop da kaba aidaw ba kan mih ka jingkhñium na kiwei pat ki nongtrei jong ka NHM.
“Ha ka jingshisha ngim dei satia ki nongtrei jong ka NHM namarba ia ka kam ba ngi trei la bei pisa hi da ka Sorkar Jylla bad ia ka NHM la bei pisa da ka Sorkar Pdeng,” la ong u Bah Roypar.
Kum ban shu pyntip hangne, ka tnat ka Koit ka Khiah ka Sorkar Jylla ha u bnai Nohprah, 2023 ka la khot Tender ia ki Kompeni ban pyniaid ia ka EMRI-108 hadien ba la kut ka samoi treikam jong ka kompeni GVK.
“Ka Sorkar kam dei shuh ban dang khot ia ka Tender hadien ba ka la mih ka jingbym ia sngewthuh jingmut hapdeng ki kompeni ha ka por ba ka Sorkar ka la dep khot ia ka tender ha u Nohprah, 2023,” u la ong bad bynrap, “wat ia ka Tender ruh kim pat ioh hynrei ki la ia pynkulmar namarba ki don napdeng jong ki, kiba don dak sniew (Black Remark).
U la iathuh ba ia kane ka jingiakulmar hapdeng ki kompeni ka sorkar ka la phah sha ka tnat Aiñ.
“Ka Myntri kaba peit ia ka tnat ka Koit ka Khiah, ka dei hi ka Myntri kaba peit ia ka tnat Aiñ kan wan hajuh hi bad kito ki kompeni kiba thep Tender myn ha kane, kin sa mih biang ki jingkulmar,” u la bynrap.
“Namarba ka Sorkar ka la biang nadong shadong ka ladei ka por ban shimkhia hi ban thaw da ka Emergency Cell ne ka Society,” la ong shuh shuh u Bah Roypar.
