Shillong, K’lyngkot, 29: U MDC jong ka Mawlai Constituency u Bah Teiborlang Pathaw u la ong ba kum u nongmihkhmat uba la jied da ki paidbah jong ka Mawlai Consituency um don satia ka jinglehrain ban trei na ka bynta ka jingmyntoi ki paidbah hapoh ka Constituency.
U Bah Teibor u la pynpaw ia kane haba pynphai nia ia ka jingshah kynthoh ha u MLA jong ka Nongkrem Constituency u Bah Ardent Miller Basaiawmoit uba la ong ba u Bah Teibor u dei ban lehraiñ ban mih hadien ba u la rem ha ka ilekshon MLA ha u snem 2023 na Mawlai Constituency.
Haba pynphai nia ia ka jingkynthoh u Bah Ardent uba ong, ‘wat ju leh MLA jubor,’ u Bah Pathaw u la ong, “ia nga la jied da ki paidbah jong ka Mawlai Constituency kum u MDC ba ngan peit ngan khmih ïa ka Mawlai Constituency bad naduh ba nga la jop ha u snem 2019 ngam shym la shongthait bad kloi ban trei na ka bynta ka Constituency. Kam pat ju don ruh kano kano ka sien ba ngan tuklar ïa ki kam jong u MLA ka Mawlai la ka dei ka MLA skhim ne kiwei pat ki kam jong u MLA.”
U Bah Pathaw u la ong ba um da donkam ba un leh MLA kumba la kynnoh da u Bah Ardent, namarba um dei hi ruh u MLA hynrei u dei u MDC ka Mawlai bad u dei u nongmihkhmat uba ki paidbah hi ki la jied.
“Ym don ba lah ban khang ïa nga kum u MDC ban trei na ka bynta ka Mawlai Constituency,” la ong shuh shuh u Bah Pathaw.
U la buh jingkylli ruh ïa u Bah Ardent hangno ka don kata ka aiñ kaba ong ba u MDC um lah ban trei la ka dei ban wanrah skhim pynroi na ka Sorkar Kmie, Sorkar jylla ne na kino kino kiwei pat na ka bynta ka jingmyntoi u paidbah.
“Nanduh ba nga la shahjied kum u MDC, nga dei u shakri jong ki paidbah ka Mawlai bad ha ka jingiaid lynti nga la ïohi shibun ki kam kiba ka mawlai ka donkam, bad kum u MDC nga la trei shitom ban wanrah ia ka jingkylla ha Mawlai da ka jingïatreilang bad ki nongïalam shnong bad ki paidbah,” la bynrap u Bah Pathaw.
U la ai nuksa ruh katto katne ki kam kum ka jingsiang ïa ki lynti ïaid kjat ha kaba ma u bad ki Dorbar Shnong ki la leit ban pynsngew sha ka Sorkar Jylla, ka jingshna ïa ki surok kiba donkam kiba la sahteng la bun phew snem, nalor ka jingbuddien ban pynrung ia ki katto katne ki shnong ha Mawlai ban ïoh ïa ka skhim 100 sngi kaba ka la urlong da ka jingleit tur barabor bad kine ki la urlong na ka bynta ka jingmyntoi ki paidbah ka Mawlai.
“Da ka jingïai buddien, ki shnong ha Mawlai ki bym rung hapoh ka skhim 100 sngi mynta ki la rung ha kaba la lah ban pynkylla sha ka Census Village ym shuh ka Census Town,” la iathuh u Bah Pathaw haba pynpaw ia ka jingtrei jong u kum u MDC uba la jied da ki paidbah.
U la ïathuh ruh ba ka surok na Shillong-Mawlai Bypass kaba ïaid lyngba ka shnong Umsaw ka dei ka jingtrei shitom jong u lem bad ki nongïalam shnong bad mynta ka la urlong ha kaba ka jingtrei ka la ïaid shakhmat, nalor ka jingwanrah ïa ki Floodlight ha Madan Heh Stadium ban pynthaba ia ka madan.
