Shillong, ïaïong, 10: Uwei u nongbylla bar jylla uba la tip kyrteng kum u Arjun Rai 52 snem ka rta u la khladnoh ha NEIGRIHMS Hospital, Shillong hadien ba u la mynsaw jur na ka jingshah thombor ha ki runar ha ka sngi Balang ha ka por kumba 11:15 baje mynstep ha ka dong Umsohkhlur ha Mawlai Mawroh.
U Superintendent of Police ka East Khasi Hills ha u kyrwoh ba la phah sha ki lad pathai khubor u la iathuh ba ki Pulit ki la register case halor kane ka jingjia bad ka jingtohkit ka dang iaid shakhmat ban ithuh ia ki nongleh kam bymman.
U Rangbah Shnong ka Mawlai Mawroh Bah HBR Lyngdoh u la ong, “ka long kaei kaei ka jingjia kaba sngewsih bad ka la jia ha ka por mynstep kaba ngim poi pyrkhat ba kan jia kumne bad ki shu wan ki briew kiba ym ithuh wat ki paramarjan ruh kim lah ban ithuh dur mano ba dei. Ki shu rung shapoh, ki shu kylli mano ba dei nongtrei bym dei ki Khasi ki shu tied shu bom bad hadien kata ki la phet noh.’
“Ngin dang hap ban buddien hi khnang ba kum kine ki jingjia kin ym jia shuh hapoh ka shnong jong ngi,” u la ong.
Haba kylli, ula iathuh ba katkum ka jingioh jingtip jong ki nongkitkam shnong, kine ki runar ki dei kiba wan da ka kynhun kumba 6 ngut. “Ki la kah ia la ka durkhmat bad ki shu kylli beit shapoh bad tang kata hi ym lah ban ithuh mano ba dei,” u la bynrap.
“Na ka liang jong ka Dorbar Shnong ka pynrem bad ka pyrshah ia kane ka jingleh kum ki riewbiej ki riewkhlaw, ban shu wan, shu tied bad shu bom khlem da tip mano ba dei bad mano bym dei. Ka long kaei kaei kaba sngewsih bad ngim kwah ba kum kine kiei kiei kin dang wan jia shuh shuh hapoh ka shnong,” la ong u Bah Lyngdoh.
Haba kyntu ia kino kino ki briew kiba pyrshah ia ka jingwanrah nongbylla bar jylla hapoh u pud u sam jong ka shnong, u la ong, “wan shakhmat, kylli kaei kaba phi donkam bad lada phi kwah kylli jingkylli iano iano ruh wan da ka lynti kaba dei hynrei ban shu wan bad ban shu leh kumne ka buh jingsyier ia ka jaidbynriew jong ngi kiba don shabar ka jylla jong ngi. Lada kiwei ki iohi ia kane ka jingjia lyngba ka Social Media kaei ka ban ktah ia ki briew shabar jong ka shnong jong ngi.
