Shillong, ïaïong, 10: Ka Executive Committee jong ka High Court of Meghalaya Bar Association (HCMBA) ka la pynrem jur halor ka jingshah byrngem jong ki arngut ki Muktiar ba pawkhmat ha ka nongbah Shillong ha ki katto katne ki runar lada ki iai bteng ban iasaid na ka bynta ki mukotduma jong ki nongwad jingiarap bad ban iashim bynta ha ka jingmudui jong ki nongwad jingiarap.
“La pynkhlain ia ka jingbyrngem da kaba thep ruh ar tylli ki kuli (pistol) hapoh ka shithi,” ong u President ka HCMBA u C. Chakravarty.
Ki dkhot jong ka Association da kawei ka sur ki la pynpaw ba kane ka dei ka jingtuklar ia ka jingtreikam jong kine ki arngut ki Muktiar ym tang ba ka pynkheiñ ia ka hok katkum ka riti synshar bad kiwei kiwei ki hok longtrai hynrei ka dei ka jingleh donbor ia ka nongrim jong ka juk shai.
“La shim rai da kawei ka sur halor ka jingshah byrngem jong kine ki arngut ki Muktiar da kaba pynrem jur ha ka kyrteng jong ka Association ryngkat ka jingkular sha baroh ki Nongiasaid aiñ jong kane ka Association kin don beit ha syndah jong ki ha kum kane ka por kaba eh,” la ong ka Assocation.
