Shillong, Jymmang, 27: Ka dorbar shnong Erpakon ka la kyntait mardor ban iashim bynta ha ka jingialang ne ka Peace Meeting ba la khot da u Deputy Commissioner jong ka Ribhoi District ha ka Lah Sngi u Blei.
Ka jingkhot jong u Deputy Commissioner ia kane ka jingialang ka long ban pynneh ia ka shongsuk shongsain ha ka shnong Erpakon hadien ka jingshah pyniap jong u Bah Kyrmen Lyngdoh Nonglait dang shen.
Na ka liang jong u Deputy Commissioner u la khot ruh ia ki nongmihkhmat na ka dukan bam R.N. Sharma Hotel, ia ki trai iing bad ia ka Dorbar Shnong ban iathir iatai halor ka jingjia kaba la wanrah ia ka jingiap jong u Bah Kyrmen Lyngdoh Nonglait, ha kaba la kynnoh ba u la shah pyniap ha uwei u nongtrei jong ka dukan bam R.N. Sharma Hotel.
Ka jingkyntait jong ka Dorbar Shnong Erpakon ka long ba ka la ieng skhem beit halor ka nongrim ban beh lut ia baroh ki bar jylla napoh ka shnong bad ban mana ruh ba kim bit shuh ban dang trei bylla ne leh ia ki kam khaii pateng hapoh u pud u sam jong ka shnong Erpakon.
Shwa kane, ka Dorbar Shnong, ba la ialam da u Rangbah Shnong u Bah M. Thongni bad u Secretary u Bah Lambor Kharshilot, ki la pynlong ia ka jingialang ha ka por mynstep ban iathir iatai halor ka jingkhot iakren jong u Deputy Commissioner, hynrei ka jingialang ka la rai beit da kawei ka sur ban ym leit iashim bynta satia ha ka jingialang.
