Shillong, ïaïong, 07: Ka Khasi Students Union (KSU) North Khasi Hills District Unit lyngba ka Education Cell ryngkat ka jingïatreilang bad ka shlem ai jinghikai El Elyon Institute kan pynlong ïa ka Free Coaching Class na ka bynta ki samla pule ba dang ap ïa ka result Class-12 bad kiba la pyndep ïa ka Higher Secondary School Leaving Certificate (HSSLC) ba kin pynkhreh ïa ka Common University Entrance Test (CUET) Under Graduate (UG) ban pynïaid da ka National Test Agency (NTA) kane ka CUET-UG kan dei ka sien kaba nyngkong ba la NTA kan pynïaid ïa kane ka exam.
Ha ki snem ba ladep ka NTA ka la pynlong ïa ka exam CUET na ka bynta ki Post Graduate ki samla pule ki hap ban pas ïa ka CUET-PG ba kin ïoh rung klas ha ki skulbah bapher bapher la ka dei ha jylla Meghalaya ne shabar jylla kumta ka KSU ka sngewdei ban shimkhia ïa kane ka mat khnang ba ki samla jong ngi kin ïoh rung klas wat shabar jylla ruh.
Ka El Elyon Institute ka dei ka shlem ai jinghikai kaba ai jinghikai bapher bapher ïa ki samla hapoh ka them Ri Bhoi.
Kane ka lad ban ai ka jingshakri sha ki samla pule ka thaiñ jong ngi lyngba ka jingai jinghikai ei ïa ki samla ban pyntbit ïalade ban thoh ïa ka Exam CUET kaba yn pynïaid da ka NTA kaba long ka Exam kaba kongsan ha shwa ba ki samla jong ngi kin rung sha ki kyrdan kiba kham shaneng ha ki jingpule (Academic).
Kane ka sienjam ba ka KSU ka shim ka long ruh ban pynshlur ïa ki samla pule ba kin lah ban pynkhreh khambha ha kiwei pat ki eksamin ha ki kyrdan ba kham shaneng ha ka pule puthi.
Ka plie lad ïa baroh ki samla ba kin mih shakhmat ban pynkhreh ïa ka exam CUET na ka bynta ki samla ban rung klas na ka bynta ka Under Graduate ka pdiang sngewbha ïa ki samla na ka dong ka thaiñ Ri-Bhoi bad kumjuh ki samla pule jong ka jaidbynriew Khasi na kiwei ki District ha kaba ki lah ban shim bynta da ka online class.
Ki Form na bynta kane ka Free Coaching CUET- UG la pyllait naduh ka 6 tarik mynta u bnai bad kan kut haduh ka 19 tarik mynta u bnai bad ïa ki jingai jinghikai yn sdang naduh ka 22 tarik, Ïaiong 2024 bad ka por kan long naduh 3:00 baje haduh 5:00 baje janmiet manla ka sngi ha Nongpoh.
Ka seng ruh ka dawa ba ka tnat Pule Puthi ka Sorkar Jylla kan pynbun ïa ki Examination Centre hapoh ka jylla ha manla ki District Headquarters na ka bynta ka jingsuk bad ka bit ka biang ki samla pule ka jylla.
Ïa ki jingtip ba khambniah phi lah ban telephone ïa kine ki number phone +91 9366172780 lane +91 9383145301 lane +91 9612056636. Ngi kyrmen lyngba kane ka sienjam kan wanrah ïa u soh u thiang na ka bynta ki Samla jong ngi, la pyntip u Chairman ka Education Cell ka KSU, NHKD u samla Banjoplang Maring.
