Shillong, ïaïong 07: Ka long ka kabu ksiar ïa ki khynnah kiba don ïa ka sap ha ka phutbol jong ki Shnong ba hap sha ka thaiñ Pomlakrai, Nongkrem,Laitkor, Smit hadien ba ka PFR Football Academy kaba long kawei ka shlem ai jinghikài football ka la ïoh ban plie sa kawei ka shlem ai jinghikai haka shnong Mawpynthih East khasi Hills.
Kane ka jingwanrah jong ka PFR Football Academy ïa katei ka Shlem ai jinghikai phutbol ha katei ka shnong kan ïarap shibun ki shnong ba marjan ha kaba ki kmie ki kpa kila ïohlad ban phah ïala ki jong ki Khun ha katei ka Center ba kham jan ym shuh ban wan shaduh sha sor.
La plie ïa katei ka shlem ai jinghikài football hynnin ka Sngi Saitjain (6 tarik, ïaïong, 2024) jong ka taïew ba ladep, bad ki Khynnah kiba wan pynïasoh ki don kumba 60 ngut tam .
Hashuwa ban sdang plie pyrda ïa katei ka shlem la ïoh ban pynlong ïa ki jingïalehkai exhibition, ha kaba saw tylli ki kynhun ki wan ban ïashim bynta na katei ka Shnong ba Marjan ha ryngkat bad ka kynhun phutbol ka PFR ha kaba ïa ka namlahduh ha katei ka jingïalehkai la ïoh rah daka Nongkynrih FC hadien ba pynliem ïa ka PFR reserved Football team da 1-0 kol.
La plie ïa kane ka shlem ai jinghikai da u samla Samla Franky Kharumnuid – President ka Academy ha ka jingïadon ryngkatlang ki Coach, Bah Mickson, Robin bad Amrit.
Nalor kane, la pyllait ïa ka jersey da u Coach ba dei khmih ha Mawpynthih- u Bah Mickson, katba ïa ka bynta ban pyllait ïa ki tiar pyndonkam haba lehkai da u Secretary ka Dorbar Shnong Mawpynthih ryngkat ki nongkitkam ka Mawpynthih SC.
