Shillong, Jylliew, 19: Ka United Democratic Party (UDP) ka la rai ban ieh beit ha ka jingstad jong ki MDC ka party halor ka jingshah pynkhyllem ka Executive Committee ha ka National Peoples Party (NPP) da ka jingïatreilang bad ka Indian National Congress (INC).
Ha ka jingïakren bad ki lad pathai khubor hadien ba la wai ka jingïalang bad ki MDC jong ka party, u Bah Metbah Lyngdoh u la ong ruh ba kam don satia kano kano ka rai ba ka UDP kan ym ïatrei shuh bad ka Sorkar ba la ïalam da ka NPP.
Shuh shuh u la ong ba ka jingkhyllem jong ka EC ba ïalam da ka UDP kan ym ktah satia ïa ka jingïadei bad ka NPP hapoh ka jylla.
“Ngin sngap shwa nyngkong ïa ki daw kiba la pynlong ïa ki (NPP) ban wanrah ïa ka No Confidence Motion,” u la ong da kaba bynrap ruh ba ka party ka la shim rai ruh ban ieh ha ka jingstad jong ki MDC ban rai halor kane ka kam.
Ka UDP ka dei ka paralok kaba kham kongsan jong ka NPP kaba iatreilang hapoh ka kynhun Meghalaya Democratic Alliance kaba bat ia u lakam synshar ha ka jylla. Ka NPP da ka jingai jingkyrshan jong ka Congress kaba shong ha ka Liang Pyrshah ka la pynkhyllem jraiñ ïa ka Executive Committee ba la ïalam da ka UDP lyngba ka No Confidence Motion ba la wanrah ha ka sngi sdang jong ka Dorbar Lyiur ka Council. U Bah Metbah u la ong ba ka UDP kam shym la poi pyrkhat ba ka NPP kan wanrah ïa ka No Confidence Motion pyrshah ïa ka Executive Committee ba ïalam da ka United Democratic Alliance (UDA).
“Ngim lah shuh ban sngewthuh ïa ka jingthmu (halor ka jingwanrah ïa ka No Confidence Motion), namarba la shu wanrah kyndit bad ha ki saw snem ba la leit noh, ka EC ka la treikam beit jaijai khlem kano kano ka jingshah pynwit,” u la ong. “Nga kubur ba kin don borabor ki jingduna ha ka jingtreikam hynrei kam long kaba dei ban shu pynkhyllem ïa ka EC bad ban thaw ïa ka EC ba thymmai manla ka sngi. Kaei kaba kham kongsan ka dei ka jingïakren bad ka jingïasngewthuh jingmut hapdeng ki dkhot jong ki seng saiñpyrthei bapher bapher kiba ïatreilang hapoh ka kynhun,” u la ong. Haba kylli, u Bah Metbah u la ong ba ka UDP kam lah ban sngewthuh shuh ïa ka jingïapynbeit hapdeng ka NPP bad ka Congress.
U la ong ba ka Party shen kan sa rah ïa kane ka kam sha u Myntri Rangbah ka Jylla u Conrad K. Sangma, uba long ruh u Chairman jong ka Meghalaya Democratic Alliance (MDA).
