Shillong, Rymphang, 03: Ka Mission Smile, Guwahati ryngkat ka jingïatreilang bad ki District Early Intervention Centers lyngba ka Rashtriya Bal Swasthya Karyakram prokram ki la pynlong ïa ka Screening bad ban puid ïa ki khynnah rit kiba shitom na ka jingkad ka shyntur kaba la tip kum ka Cleft Lip bad Cleft Palate.
Haduh 54 ngut ki khunlung kiba kad shyntur naduh ka por ba dang kha mynta ki la ïoh biang ïa ka jingbhabriew jong ka durkhmat lyngba kane ka jingsumar ha Ganesh Das Maternal and Child Health Hospital.
Ïa kane ka Screening bad ka jingsumar la sdang naduh ka 30 tarik Kyllalyngkot, 2024 bad ba la pynkut ha ka sngi Saitjaiñ.
Kine ki 54 ngut ki khunlung ba la ïoh jingsumar ki long 12 ngut na East Khasi Hills, 14 ngut na West Khasi Hills, 10 ngut na South West Khasi Hills, 8 ngut na Ribhoi bad 10 ngut na East bad na West Jaintia Hills.
Ki don pat sa 20 ngut kiba ki doctor kim shym la lah ban ai jingsumar na ka daw ba ki khunlung kim don ïa ka met kaba koit ba khiah.
Ka Medical Superintendent jong ka Ganesh Das Hospital ka Dr. A. Lyngdoh ha ka jingïakren bad ki lad pathai khubor ka la ïathuh ba ka jingthmu jong kane ka jingai jingsumar ei ka long ban ïarap ïa kito ki briew kiba duna ka ïoh ka kot ba kin ïoh phah sumar ïa la ki jong ki khun kiba kad shyntur khlem kano kano ka jingsiew.
Ka la ong ba ka thong jong ka Rashtriya Bal Swasthya Karyakram prokram ka long ban pyllait ïa ki briew na kum kine ki jingkad ka shyntur bad ka la ïathuh ruh kane ka dei ka sien kaba ar ba ka Ganesh Hospital Shillong kan pynlong ïa kane ka jingsumar.
Katkum ka jingïathuh jong ka Dr. Lyngdoh, ha kane ka kynti kiba la wan ban shah screening ki la poi sha ka 76 ngut bad kiba la shah sumar ki long 54 ngut.
Ka Dr. Adreena ka la khot bad wer ïa ki kmie ki kpa ha baroh kawei ka jylla ba lada ki don ïa ki khun kiba kad shyntur kin wan shakhmat ban sumar ïa ki ha kane ka Hospital.
Ha kane ka sngi, la sakhi lang da ka Pediatrician ka Dr. S. Longtrai, u Pediatric Surgeon Dr. P. Khongsngi, ka Medical Officer DEIC ka Dr. J. Rani, u Managing Director ka Mission Smile guahwati u Dr. Hitesh, u Asst. Genl. Manager ka Mission Smile Dipul Malakar, u Manager ka DEIC ka East Khasi Hills Bah Wanraplang Kharpran, ka Manager ka DEICEasst Jaintia Hills ka Kong Daphihi Passah bad u State RBSK Consultant, ka NHM, Meghalaya u Bah Johnson Nongbet.
U Dr. Hiteswar Sarma u la ong ba ka jingpuid kam dei ban thep da ka doh hynrei la shna ha ka rukom kum ka juk kaba mynta ban suh bad ban pyndap ïa ka shyntur ba la kad bad ban leh ïa kane yn hap ban leh tang shisien shisnem na ka bynta laisien bad kan shimpor haduh lai snem ban suh ïa ka shyntur bad kumjuh ruh ban pynbeit artad ïa ka rukom kren jong ki heprit khnang ba kin lait na ka jingkren thlun.
