Shillong, Nailur, 26: U Heprit Isboklang Wanniang uba la mynsaw jur na ki bynta jong ka kti ha ka jingshah bat bording san bnai mynshwa naba u la leit kum leit pyntyngkhuh ïa u sainar ding ilektik katba u dang lehkai hapoh ka shnong mynta u la ïoh pdiang ïa ki lad jingïarap naka ophis jong ka Meghalaya Power Distribution Corporation Limited (MePDCL) Nongstoiñ.
Kum ban shu pynkynmaw hangne, ka Hynñiewtrep Youths Council (HYC) hadien ba ka la leit jngoh ïa une u heprit san bnai mynshwa ka la lap ba u don hapdeng ka jingshitom kaba jur bad na ka liang jong ka Seng ka la leit mih sha ka tnad sam bording ha Nongstoiñ ban ïakren halor kane ka jingjia bad lyngba ka jingïai buddian jong ka seng, une u heprit mynta u la ïoh ïa ki lad jingïarap na ka ka Meghalaya Power Distribution Corporation Limited, Nongstoin.
Ka Seng ka pynpaw ïa ka jingsngewkmen bad ka ai khublei ruh ïa u Executive Engineer jong ka Meghalaya Power Distribution Corporation Limited, ïa u SDO bad ïa ka ophis baroh kawei kiba la shimkhia ban pynïoh ia ki lad jingiarap ïa u heprit Isboklang.
