Shillong, Jylliew, 03: Ki dkhot ka Hynniewtrep Integrated Territorial Organisation (HITO) ryngkat ka jingiatreilang bad ki dkhot ka Seng Samla Shnong Mawkyrwat (SSSM) ha ka step phyrngab Lah Sngi u Blei ha ka por 7:00 baje mynstep ki la ioh bat ia uwei u rangbah ia uba la suba ba u dei u snar nongkhaii drok hapoh ka shnong Mawkyrwat ia uba la tip kyrteng kum u Khrawbok Namlein hadien ba kine ki ar tylli ki kynhun ki la trei shitom naduh dang saw tyngab ban ap ktem ia une u nongkhaii drok.
Na ka met jong u Khrawbok, uba ju khot sin ruh da u Pylliaw, la ioh kurup ia u drok bad ia ki thyrnia injek ki bym pat pyndonkam.
Ha ka jingiakren bad ki lad pathai khubor, ki nongialam ka HITO ki la iathuh ba ki la buddien bha la bun bun bnai ia ka iaid ka ieng jong u Khrawbok hadien ba ki la ioh jingtip ba u dei uwei na ki snar khaii drok.
Ki la iathuh ruh ba ha kane ka sngi, shwa ban iohkem ia u, ki la buddien naduh ka por 4 baje mynstep hadien ba la ioh jingtip ba u la mih na iing ban leit buh ia u drok, hynrei namar ka jingshalak bad ka jingstad buit ka jong u ban kylliang kali kawei hadien kawei pat ym shym la ioh satia ban bat ia u ha ka por kaba biang.
Na ka liang jong ka seng ka la aiti noh ia u Khrawbok sha ka dorbar shnong Mawkyrwat ban tian bishar ia u, bad hadien kane la rai ban phah ia u sha ka jaka ai jingsumar khnang ba un lait noh na kine ki kam sniew kiba u ju leh baroh shikatta.
