Shillong, Jylliew, 03: Ki nongialam jong ka Jaintia Students Union (JSU) ha ka lah sngi u Blei ki la iakynduh ia ka Director General of Police (DGP) ka Kong Idashisha Nongrang bad kyrpad ruh ba kan pynkhlaiñ ia ka jingtreikam jong ki Pulit khamtam ha ki shnong khappud jong ka rilum Jaintia.
Ki nongialam ka seng ki la aiti ruh ia ka dorkhas ha ka DGP.
Kawei na ki mat kiba hakhmat eh ba ka seng ka la kdew ha ka dorkhas ka long ban pynkhlain ia ki Border Police Outposts namar ka jingmih ki huri hura na ka por sha ka por ha khappud bad ka Jylla Assam namar ka jingshah pyndik jong ki Khasi Pnar ha ki paidbah ka jylla Assam.
“Ki la jia bun ki jingshah pyndik bad ki jingshah pyniap ki briew jong ngi ha ki nongshong shnong ka jylla Assam kiba sah ha khapppud ka rilum Jaintia,” la pynpaw ka seng ha ka dorkhas.
Ka JSU ka la kyntu ia ka DGP ban buddien ia ka jingthmu jong ka Sorkar ba pynkha ia ki Border Police Outposts ha ki hynniew tylli ki jaka ba kham mih ki jingiakajia, bad kynthup ruh ha ka shnong Mukroh, Khanduli bad ha ka shnong Langpih.
“Ngi ai jingmut ba phin shna pynbna ia ki jingtei ha kine ki Outpost, khamtam ha ka shnong Mukroh bad ha Khanduli. Ka jinglong jingman jong kine ki Outpost ka long kaba isangsot bad ki don ruh ki Outpost ba la shu tap tang da ki tin bad kane ka buh jingma ia ka jingim jong ki Pulit bad nalor kata, wat ka jaka ba don ka Outpost ruh kam dei satia ka thanat bapura,” la ong ka JSU.
Ka Shnong Mukroh bad ka shnong Khanduli ki dei ki ar tylli ki shnong ba ki ju mih bunsien ki jingiakajia hapdeng ki nongshong shnong jong ka jylla Meghalaya bad ka jylla Assam.
Kum ban shu pyntip hangne, ha u Naiwieng, 2022, hynriew ngut ki brirew, ba kynthup san ngut na Meghalaya bad uwei u Pulit pahara khlaw ka Assam, ki la iap ha ka jingsynreit kuli ki Pulit Assam ha ka shnong Mukroh.
Ka JSU ka la kyrpad ia ka DGP ban pynkhlain ia ka Anti-Narcotics Task Force ha rilum Jaintia, da kaba pynpaw ba kane ka thain ka dei kawei na ki lynti iaid ba kongsan jong u drok shapoh ka jylla.
Shuh shuh, ka seng ka la kyrpad ia ka DGP ban iarap lem ia ki samla kiba don ka jingangnud ban rungkam ha ka tnat Pulit bad ai jingmut ban pynlong ia ka Physical bad Written eexamination ha Jaintia Hills khnang ban pynduna ia ka jinglut jingsep jong ki samla wadkam.
Ka seng ka la ai jingmut ruh ban buh ia u Women Helpline (WHL), ban treikam baroh 24 kynta khnang ban iarap ia ki kynthei bad ki khynnah kiba iakynduh ia kino kino ki jingeh bad ki jingshah thombor ha ka jingim jong ki.
Namar ka jingjyllei ki kam khrong pisa, ka JSU ka la pynsngew ha ka DGP ia ka jingmih ki khyrdop khrong khajna kiba ktah ia ki nongrep bad ia ki kali kamai.
