Shillong, Jylliew, 08: Ka Meghalaya Legislative Assembly ka la shah pynkup burom da ka khusnam ha ka Ministry of Parliamentary Affairs halor ka jingstet ban pyntreikam ia ka National eVidhan Application. Ka Meghalaya Assembly ka dei kawei napdeng ki khyndai tylli ki Legislative Assemblies jong ka ri kiba la pyntreikam ia kane ka Application.
U Myntri Khynnah uba peit ia ka Parliamentary Affairs u Arjun Ram Meghwal u la aiti ia ka khusnam sha ka Meghalaya Assembly ha ka National Workshop on NeVA kaba la long ha Convention Hall, Ashok ha New Delhi ha ka 25 tarik, Jymmang, 2023.
Ia ka khusnam la pdiang sngewbha da u Dapborlang Marwein uba long u Computer Programmer bad u Nodal Officer (NEVA), Meghalaya Legislative Assembly bad ka Kong Lawanda Lyndem kaba long ka Deputy Secretary jong ka Parliamentary Affairs Department, ka Sorkar Meghalaya bad ha kajuh ka pork a Nodal Officer jong ka NeVA.
U Myntri Rangbah ka Jylla u Conrad Sangma, bad ki Symbud Myntri Rangbah u Bah Prestone Tynsong bad u Bah Sniawbhalang Dhar ki la ai khublei ia ka kynhun jong ka NeVA bad ka IT Cell, Meghalaya Assembly na ka bynta ka jingtrei shitom jong ki ban pyntreikam ia ka NeVA.
U Commissioner and Secretary jong ka Assembly Secretariat u Dr. Andrew Simons u la pynpaw ka jingsngewnguh ia ka Ministry of Parliamentary Affairs halor ka jingithuh ia ka jingtrei shitom jong ka Sorkar Jylla bad ka Meghalaya Legislative Assembly Secretariat.
Haba kren ha ka jingpyllait paidbah ia ka NeVA project ha Assembly, u Dr. Andrew Simons u la pyntip ba ha ka 27 tarik, Lber 2020 la thung ia ka State project Monitoring Unit (SPMU) cum NeVA Implementation Committee ba la khlieh da u Chief Secretary ka Sorkar Jylla.
Ia ka soskular iasngewthuh jingmut (MoU) la iasoi ha ka 30 tarik, Lber, 2020 hapdeng ka Ministry of Parliamentary Affairs, New Delhi, ka Sorkar Meghalaya bad ka Meghalaya Legislative Assembly bad ka House Committee for e-governance and general purpose ia kaba la thaw ha ka 20 tarik, Naiwieng, 2020.
Ia ka Detailed Project Report (DPR) la mynjur da ka State project Monitoring Unit ha ka 21 tarik, Nailur, 2020 bad ia ka projek la pyllait paidbah ha ka jyllla ha ka 18 tarik, Lber 2021.
U Commissioner and Secretary u la pyntip ba ia kane ka projek la bei jingiarap pisa da ka Sorkar India bad ka Sorkar Jylla kaba long 90:10.
