Shillong, Jylliew 8: U District Magistrate jong ka West Khasi Hill District u Bah Garod LSN Dykes ha ka sngi palei u la pynjari da ka Section 144 CrPC, kaba khang bad mana pyrshah ïa ki briew lane ki kynhun ban kem bad tong dohkha da kaba pyndonkam da ki kynja dawai bad ban pynbthei bom ha shilynter jong ka wah Wahblei bad wah Khusang, kiba hap hapoh ka Mawshynrut Block, West Khasi Hills District.
“Kane ka jingleh ka wanrah ïa ka jingpynjot ïa ki kynja ba im hapoh ki um, ki wah bad ka pynsniew ïa ki sawdong sawkun jong kine ki wah. Kumta lada lap ïa kiba ïaleh pyrshah yn pynshitom katkum ki kyndon jong ka aiñ,” la ong ka Hukum. Kane ka jingmana kan treikam noh mardor naduh ba la pynmih ïa kane ka hukum.
