Shillong, Nailar 21 : Ka National Accreditation Board for Hospitals and Healthcare Providers (NABH) kala khmih bad pynshongdor ia ka Supercare Hospital, Shillong, bad shem ba ka bud ia ki kyndon ka NABH ha ka jinglehbha ha ka kam Nursing.
Ka NABH ka dei ka kynhun ba khmih ia ka jingtrei bad jingshakri babha ki hospital ha India. Ka dei ka bynta jong ka Quality Council of India (QCI), ka kynhun ha ka ri kaba kyntiew bad pynneh ia ka jinglehbha ha kiba bun ki liang ha kylleng ka ri. Ka NABH accreditation program ka buh ia ki kyndon na ka bynta ki lad sumar pang ha India, kynthup ia ka jingshakri ki nurse, ban pynthikna ba ki ai ia ka jingsumar ba paka tam bad ba don jingshngain. Kine ki kyndon ki dei kiba la pynshong nongrim ha ki rukom sumar babha tam bala leh ha kylleng ka pyrthei bad la pynwandur ban nang pynbha ia ka jingshngaiñ ki nongpang bad ka jingsumar babha ha ki hospital. Ki kyndon ka NABH mynta ki dei ki kyndon ba halor eh na ka bynta ki hospital ha India. Lada ka hospital kala ïoh jingithuh na ka NABH, la shim ba ka dei ka jaka sumar babha bad ka ioh jingithuh na kylleng ka pyrthei.
Ki kyndon jinglehbha ha ka kam nurse bala buh da ka NABH ki long ki jingbatai ruh halor kumno ban pynshongdor ia ka jingshakri ki nurse ha ki jaka sumar. Ka jingai certificate, kaba khmih lyngba ki 7 tylli ki bynta ba kongsan, ka khmih bha kumno la ai jingsumar da ki nurse ha ka rukom ba shngain, ba paka bad ba burom. Ka ïarap ruh ban pyniaid, ban btin lynti bad kyntiew ia ka kam nurse bad ka batai ruh ïa ki nurse administrator bad ki supervisor kumno ban kyrshan bad ai ia ka jingsumar katkum ka jingdonkam ba wan hakhmat eh.
Hadien bala khmih bniah bha ban bud ia ki 48 tylli ki kyndon ba kynthup ia ki 216 tylli ki jingthmu, ia ka Supercare Hospital la ai ia ka Nursing Excellence Certification ha ka 13 Jylliew 2023 kaban treikam haduh 12 Jylliew 2025.
Ka Supercare Hospital kala poi sha ki mawmer bakhraw, namar ba ka dei ka jaka sumar ba nyngkong bad tang ma ka ha ka thain shatei lam mihngi ba ioh ia ka NABH Certification for Nursing Excellence.
Nalor kiwei ki kam bapaw ba kala nang ïoh, ka Supercare Hospital ka dei ruh tang ma ka ka hospital ha ka thain shatei lam mihngi kaba ioh ia baroh ki jingithuh NABH Accreditation for Hospital, NABH Certification for Emergency bad NABH Nursing Excellence. Haba kren shaphang ki kam bakhraw bala leh da kiba bun, ki jingjop ba dang shen ki pyni ba kala kiew bha hapoh ka jingïalam u Managing Director, u Dr. R.S. Thangkhiew, uba la pynpaw ia ka jingsngew sarong ha kine ki jingjop da kaba ong, “Kane ka jingjop ka long ka jingtynjuh ia ki nurse ba kin nang trei bha, ka jingtbit ba ki don kaba lam sha ka bha ka miat kiba shah sumar. Ka ïalam ïa ngi sha ka lynti ba kwah leh bha shuh shuh ha ka thain shatei lam mihngi.”
U Chief Operating Officer, u Bah Damien Marwein ula ong, “Kane ka jingïoh certificate ka btin ïa ngi kumno ban nang trei bha, ban pynbha shuh shuh ia ka jingtreikam, bad ban lah ban shim rai. La pynlah ïa kane da ka jingïatreilang ka kynhun ki nurse hapoh ka jingïalam i Nursing Superintendent, i Kong Mary Lyngdoh. Katba ka Supercare Hospital ka rakhe ia une u mawmer, ngi kut jingmut skhem bad kane ka long u mawjam sha kiei kiei kiba kham khraw.”
