Shillong, Nailar 21: Ia ka met jong uwei u rangbah uba la 38 snem ka rta, ia uba la tip kyrteng kum u Bah Shanbor Surong, uba la jah rngai naduh ka 17 tarik, Nailar, 2023 katba u dang mih na iing ka Nia Kha na ka shnong Patarim, Mawlai Nongkwar ha ka por 2:00 baje mynstep ban leit phai noh sha la ing sah kaba don ha Jaiaw Pdeng, Shillong la lap ia ka met jong u ha ka 21 tarik u Nailar, 2023 na riat Sonapani.
Ia ka met jong u Bah Shanbor Surong la lap hadien ba uwei u Pulit Home Guard uba ap pahara ia kawei na ki Power House jong ka Meghalaya Energy Corporation Limited kaba don ha Lumkshaid u la iohi ia kawei ka metiap kaba per ha sla um ha Sonapani ka por kumba 11:00 baje mynstep.
Mar mar une u Pulit Home Guard u la pyntip noh sha ki bor Pulit, ha kaba ki Pulit jong ka Lumdiengjri Police Station ki la leit ban shimti noh ia kane ka met jong u Bah Surong. Ki bahaing hasem kiba la wan poi ha Sonapani ki la pynshisha ba ka met iap ka dei ka jong u Bah Shanbor Surong. Hadien ba la sei ia ka met na wah, ki Pulit ki la pynkit noh ia ka met iap sha Shillong Civil Hospital, na ka bynta ban leh ia ka post-mortem khnang ban lap ia ka daw tynrai halor ka jingiap jong u Bah Shanbor Surong hashwa ban aiti sha ki bahaing hasem na ka bynta ban pyndep ia ka jinglehniam kaba khatduh.
