Shillong, Nailur 12: Ka Khasi Students’ Union (KSU) Narpuh Circle ha ka sngi baar hapoh ka jingialam u Phanuel Tongper ka la hiar marmar sha shnong Donaskur Elaka Narpuh, East Jaiñtia Hills hadien ba ka la ioh khubor halor ka jingjia shah pyniap dusmon jong kawei ka longkmie kaba kyrteng ka Priskila Suchiang, 45 snem ka rta ha ki suba khar Bangladesh kaba la jia ha ka lah sngi U Blei ha ka por kumba 11:00 baje mynstep.
Ka KSU lyngba une u kyrwoh, ka la ong ba kane ka longkmie kaba don ar ngut ki khun ka dei kaba ju khaïi lyngba ki jaka khappud bad ka Bangladesh bad uwei u Khar Muslim.
Katkum ka jingiathuh jong ki trai shnong, kane ka longkmie lem bad u khun shynrang ki la mih ban iaid da ka kjat haduh ban da poi ha kawei ka ïing trep kaba katei ka longkmie kajuh shongthait.
Hynrei une u khun jong ka u la ong ia la ka kmie ba kan shong shiphang bad ma u un leit wad lynti ban pynpoi ia ki mar, hynrei hadien ba ula wanphai sha kajuh ka jaka ula shem pynban ba ka kmie jong u ka la thiah lyngktar ha madan ha ryngkat ka jinglyngkien jong ka snam.
Ha kaba kum kane ka por la ong ba une u khun u la pyrta lyniar bad mareh ban pyrta briew, bad na ka liang ki nongshong shnong ruh ki la wan poi bran bran ha kaba la lap ba ia ka met jong ka ba la mait dusmon da ka wait ia ka durkhmat bad na ki kti ki kjat lyngkhot lyngkhot.
La ong ba kane ka rukom pyniap ka long kaba itriem shisha kumba la iathuh da ki trai shnong. Halor kane ka jingjia na ka liang ka KSU kam lah khlem da pynpaw ka jingsngewsih bad sngewbitar ia katei ka jingleh dusmon ki khar Bangla pyrshah ia kane ka longkmie bad ka pynpaw ruh ka jingsngewlem ia kitei ki arngut ki khun, u shynrang bad ka kynthei kiba la duh noh ia la ka kmie baieit ha ki kti ki riew thrang snam.
Na ka liang ka seng ka maham ruh ia kito ki briew trai shnong jong kito ki thaiñ kiba ia khaïi pateng bad ki khar Bangla ba kin long kiba husiar nangne shakhmat.
Ka KSU ka maham ruh ba ki trai shnong kim dei ban pynjuh ia kitei ki khar bangla ban ialam shapoh shnong poh thaw watla ki ia dei ha kam khaïi pateng.
Shuh shuh kane ka jingjia shah pyniap jong kane ka longkmie ka la jia ha khappud ka India bad Bangladesh, kata ha ka jingjngai kaba tang kumba 2 kynta lynti na shnong Donaskur.
Hadien kane ka jingjia ia ka met jong katei ka longkmie la shimti noh da ki pulit ban rah sha Khliehriat ban leh ia ka post morterm.
Ha kajuh ka por ka Seng ka kyntu jur ia ki bor Pulit ban pynlong ka jingthwet ban lapdien ia kitei ki riew thrang snam bad ban pynshitom tyngeh katkum ka aiñ.
