Shillong, ïaïong 29: U Symbud Myntri Rangbah ka Jylla uba peit ia ka tnat Kam Pohing Bah Prestone Tynsong ha ka Lah Sngi u Blei u la bthah ia u Deputy Commissioner jong ka East Khasi Hills District u SC Sadhu ba un khot jingialang ia ka Shillong Cantonment Board, ia ka tnat Pulit bad ia kiwei kiwei pat ki tnat treikam na ka bynta ban iakren sani ha kaba iadei bad ka jingmih ka Slum ha Lum Surve, ha lyndet Them Iewmawlong.
Dang shen ka HYC kaba la leit jurip ia kane ka Slum ka la lap ba ki don palat 80 tylli ki iing kiba la shna beain da ki poiwir kiba wan nabar ka jylla bad ring tuh ia ka bording. Shisngi hadien kane, ki nongtrei jong ka Meghalaya Energy Corporation Limited (MeECL) ki la leit ot noh ia ka bording jong kine ki longing bad lap ruh ba dei na ka dukan Ajmera Marbles ba la sam be-aiñ ia ka bording sha kine ki ing ba don ha kane ka Slum.
Ha kaba iadei bad kane, ka HYC ba la lamkhmat da u President Bah Roy Kupar Synrem ka la aiti da ka jingthoh ban dawa ia ka Sorkar ba ka dei ban weng noh ia ki briew kiba sah beain ha kane ka Slum.
“Ngi la aiti da ka jingthoh ha u Symbud Myntri Rangbah ka Jylla bad u la bthah ia u Deputy Commissioner jong ka East Khasi Hills District ba un khot da ka jingialang ia ka Shillong Cantonment Board, ia ka tnat Pulit bad ia kiwei kiwei pat ki tnat treikam khnang ban iathir iatai halor ka jingmih jong ka Slum,” la ong u Bah Synrem ha ka jingiakren bad ki lad pathai khubor.
“Ka jingdawa jong ka seng ka long ban weng beit ia ki briew kiba sah beain ha kane ka jaka (jong ka Cantonment) kaba dang don hapdeng ka jingialeh mukotduma namarba na kane ka jaka ki mih ki kam sniew, ki kam runar bad ki kam khaii drok bad ngi sngewkhia bha haduh katta katta ia ka jingdon jong kine ki briew,” u la ong.
“Lashai ka sngi (Baar) u DC un sa khot jingialang ha ka por 3:00 baje nohsngi ia ka Shillong Cantonment Board, ia ka tnat Pulit bad ia kiwei kiwei pat ki tnat treikam,” la iathuh u Bah Synrem.
“Ngin ap katto katne por namarba ngi kwah ba kine ki briew ba sah beain kin mih na kane ka jaka. Lada ki bor Sorkar kim shimkhia da lade hi ngin hap ban leit weng ia kito kiba beain. Ia mynta ngin ap ap shwa ia ka jubab ba ioh na ka Cantonment bad na Sorkar,” la ong shuh shuh u Bah Synrem.
