Shillong, ïaïong, 23: Ka Hynñiewtrep National Youth Front East Khasi Hills District ha ka sngi Baar ka la kynthoh pyrshah ia ka Sorkar halor ka jingbym pynshitom ia ki jaidbynriew Harijan halor ka jingkynnoh ba ki dei kiba thaw jingkulmar ha Saw Aiom Restaurant, Iewduh, ha ka miet 20 tarik mynta u bnai.
Ha u kyrwoh ba la phah ha ka sngi Baar sha ki lad pathai khubor lyngba ka video u President ka seng Bah Stevenson Raymond Khyriem u la kynthoh ba lada dei ia ki Khasi, ki Pulit kin jin da la leit kem wat shiteng synnia na ing bad kynthoh ruh ba ka Sorkar ka shu pynleh khun khatduh ia ki jaidbynriew Harijan.
U la ong ruh ba ka seng ka pynrem jur halor kane ka jingjia bad ka seng ka dawa ba dei ban pynshitom ïa kine ki jaidbynriew Harijan kiba la la ju leh donbor na ka por sha ka por ban thaw jingkulmar.
Ka seng ka la dawa ruh ïa ka Sorkar ba dei ban weng noh ïa ki Harijan na Them Iewmawlong kiba la long mawjynthud bad wanrah tang ïa ki jingkulmar na ka por sha ka por.
“Ka seng kam lah ban shu shong klikti bad ba kam kwah ruh ba ka jingiakhih beh khar Metor kan jia biang kumba la jia ha u snem 2018,” u la ong.
Une u nongialam jong ka HNYF East Khasi Hills u la ong ruh ba ha Them Iewmawlong ki ju mih bunbah ki kam sniew naduh ka ka jingkhaii drok bad kiwei pat ki kam.
Ka HNYF ka la kyntu ïa ka Sorkar MDA 2 ba ka dei ban shimkhia noh mardor ïa kane ka kam ym ban shu sngap mynthi.
