Shillong, ïaïong, 23: Kawei ka samla kaba la 26 snem ha ka 20 tarik Ïaiong, 2024 ka la mudui da ka ejahar sha ki Pulit jong ka Rynjah Police Station halor ka jingshah leh be-ijot ha ki saw ngut ki khynnah kiba ka la kam ba ki dei kiba don kumba 20 bad 21 snem ka rta.
Katkum ka ejahar ba kane ka samla ka la mudui sha ki Pulit, ka la ïathuh ba kane ka la jia ha kawei ka jaka ha nongbah Shillong ha u bnai Nailur, 2023 bad ïa ka video ba ki la ring dur ha ka por ba ki la leh be-ijot ïa ka ki la pynsaphriang ha ka rynsan Social Media shwa ka elekshon Lok Sabha kaba dang dang shu dep long shen.
Kane ka samla ka la phla ba ka ïa ithuh ithaw bha ïa uwei napdeng kine ki saw ngut lyngba ka jingïalehkai PubG bad ha u bnai Nailur, 2024 une u paralok jong ka, u la khot sngewbha ïa ka sha ing bad da ka jingshaniah ïa la u jong u paralok ka la leit sha ïing jong u khlem suba sniew eiei ïa ka jingmut sniew barieh jong u.
Ka la ïathuh ba dei ha kum kane ka por ba ma u bad lai ngut ki paralok ki la khleh da u jingdih pynbuaid ha ka umsoh bad ai dih ïa ka kat haduh ba kam tip briew shuh ïalade. Ha kum kane ka khyllipmat ba ma u, bad ki lai ngut ki paralok ki la shim kabu ban leh be-ijot ïa ka da kaba jingring video ïa kane ka kam pohjait kaba ki la leh pyrshah ïa ka long ryngieng jong ka.
Ka la pyntip ruh ba kam shym la tip eiei ba kine ki saw ngut ki la leh be-ijot ryngkat ka jingring video ïa ka hynrei dei tad haduh ba kin da pynphriang ïa kane ka video ha Social Media mynta u bnai Ïaiong, 2024 ka la ïoh jingtip ba ki la leh ïa kane ka kam pohjait.
Kat haduh ba la thoh ïa kane ka khubor, ki Pulit ki la ïohkem ïa ki lai ngut kiba donkti ha kane ka kam bymman bad mynta ki dang thwet sa ïa uwei pat uba dang phetrieh.
