Naduh ba sdang beh ka lyer Elekshon MP mynta u snem 2024, ki don katto katne ka jingleh bad jinglong ba kham pher bad ba kham phylla ki bym ju kham poi pyrkhat satia ba ki nongialam ka party bad ki nongialam jong ka ki la leh (practised) khnang ban pynksan (justified) hakhmat ki paidbah hynrei, kine ki rukom leh bad rukom pyrkhat jong ki ki ktah bad kyrtoh kylla pynban ia ki bad ia ka party ba ki don.
Ha Meghalaya jong ngi, ka dei ka sien ba nyngkong eh ba ka Nationalist People Party(NPP), ka party ba la ithuh da ka Election Commission of India (ECI) kum kawei na ki National Party ka la ialeh ia ka Elekshon khlem pynmih (issue) satia ia ki mat treikam (manifesto) jong ka. Ha ka jingshisha, baroh ki political party kiba ialeh ia ka elekshon ki dei ban pynmih ne pynbna ia ki mat kular elekshon (election manifesto) jong ki hakhmat ki paidbah. Lada kane ka party NPP ka shu bud (ditto) ia ka Manifesto jong ka BJP ruh, ka dei ban pynbna bad pynshai paidbah (declared publicly) khnang ba ki paidbah kin ia tip lang baroh.
Lada don ba pyntip ne report sha ka Election Commission of India ba ka dei tang kane ka party kaba ialeh elekshon khlem kano kano manifesto, kumno ka Election Commission of India kan jubab (react/resonse) halor kane ka kam?
Ka dei ruh ka sien kaba nyngkong ha Meghalaya ba ki nongialam paidbah (political leaders) kiba bat ia ki shuki hajrong (highest post) kum ka kyrdan Deputy Chief Minister bad Minister bad kiwei kiwei ki la sdang ban ialap elekshon tang da kaba shu kren ruma rutit kat shaba lap ba shem, ban shu thlieh six beit kat shaba lap ba shem ia ki briew ne ia ka party ba ki shun thlong mluh thlong sying kat haduh ba la shah kynshi kyneh ei hakhmat ki paidbah ba bun.
Bun ki paidbah kim sngewdei shuh ban ong ba ki dei ki nongialam paidbah namar ka rukom kren bad rukom kanbas elekshon jong ki ka la kylla long pynban kham poh wat ia ki ‘riew paidbah ruh. Kane ka rukom kanbas elekshon mynta ka sien ka la pynhiar kyrdan bad pynkylla taddor bad pohdor ruh shikatdei eh ia ka jinglong nongialam jong ki.
Bun ki paidbah ki kynthoh ba, ki nongialam jong ngi i kumba, ki kham stad bad kham donburom pynban ki riew paidbah ban kren ban ia ka rukom kren bad rukom kanbas elekshon jong ki nongialam jong ngi. Kum kine ki rukom kren bad rukom kanbas ki phalang pynban ia ka jinglong tynrai hi jong kito ki nongkren.
Ha ri India ruh kumjuh, ngi iohi ba u Prime Minister jong ngi,u Narendra Modi um don shuh kano kano ka mat treikam (crucial issues) ban kren ia ki paidbah ka ri India ha ka liang ka roi ka par (developmental works) kaei kaba ka sorkar jong u ka la lah ban pyndep ne ban pyntreikam (fulfilled) bad kino pat kiba dang sahteng ban pyndep. Hynrei, u shu thlieh six beit tang ia ki party Liang Pyrshah kum ia ka party Congress.
Kino kino ki mat (issues) ba pynmih ne kren ka Congress, ia kata u leit kren kylleng ki jaka. I kumba kiwei kiwei ki party ha ri India ki dei ki party jong ki riewsniew, ki riew bymman suda bad dei tang ka party BJP bad ki briew jong ka ki dei ki riewkhuid (angels), ki riewhok bad ki riewblei suda. Imat, kumba kiwei kiwei ki party kim nang bad shynshar ia ka ri India lait noh tang ka party BJP. Ym tang katta, ka dei ruh ka sien ba nyngkong eh ba u MLA bad u nongialam ka party BJP na Meghalaya un leit kanbas shabar kum sha Delhi haba ka party BJP ka khlem pynieng kandidiet satia wat tang uwei ruh ha ka Meghalaya lajong. Ladei ban sngewlehrain toi, ban leit pynksan ne pynroh sha kiwei pat ki State haba ha State lajong khlem nud pynieng kandidiet satia. Imat, ka dei ruh ka sien ba nyngkong ba ka political party kum ka BJP ka iaid lang noh ryngkat ryngkat bad ka niam (religion) ha ka ri synshar paidbah kum ka ri India jong ngi kaba la ai jingmane laitluid ia baroh ki jait niam (secular state). Tip shaei kan poi ka Ri jong ngi nangne shakhmat haba ki nongialam jong ngi ki la sdang ban leh da kumne? Ka por kan sa batai ia ngi nangne shakhmat.
