Shillong, Jymmang, 09: Ka Meghalaya Trader Fresh Vegetables and Ginger Association (MTFVGA) kaba long ka shatri jong ki saw tylli ki kynhun ba kynthup ia ka Khasi Jaiñtia Food Vegetables Association (KJFVA), ka Shiliang Um Trader Farmers Association (SUTFA), ka Ïewduh Khasi Pnar Association ( IKPA) bad ka Fresh Green Ginger Association (FGGA) Ri Bhoi ha ryngkat ka jingsynran jong ki nongïalam ka Federation of Khasi Jaiñtia and Garo People (FKJGP) Agriculture Cell ha ka sngi Palei ka la leit ban pynsngew ha u Symbud Myntri Rangbah ka jylla Bah Prestone Tynsong halor ki jingeh ba ki iakynduh na ka por sha ka por ha kaba ïadei bad ka kam khaïi ïa ki mar rep ha ki bynta bapher bapher ka jylla.
Ha ka jingiakren bad ki lad pathai khubor hadien ka jingiakynduh ia u Symbud Myntri Rangbah, u President ka Meghalaya Trader Fresh Vegetables and Ginger Association (MTFVGA) Bah Bristar Mawthoh, u la ong ba ka jingsniew shaba palat jong ka surok National Highway-6 ha East Jaiñtia Hills District ka la pynlong ïa ki kali kit mar rep ban sahkut da ki sngi ha surok kat haduh ba ka la wanrah shibun ki jingeh ha kaba ïadei bad ka jingpynpoi ïa ki mar rep sha kiwei pat ki bynta ka jylla.
Nalorkata, u la ong ruh ba ka jingshah bat ki kali kit mar rep ha shi lynter ka surok Ratacherra ka la ktah shibun bad kaba la pynduhnong ïa ki namarba bun ki jhur ki pyut noh shuwa ba kin poi sha ki jaka ba dei ban poi.
U la ong ba ka jingbuh ia ka khyrdop ha ki bynta bapher bapher ka la ktah ïa ki nongrep ha kaba kim ïoh ban shuh ban kit ïa ki mar rep ha ka por kaba biang.
U la pyntip ruh ba u Symbud Myntri Rangbah u la shimkhia ïa kane ka kam ha kaba u la kular ruh ban shong jingïalang bad ki tnat bapher bapher ka Sorkar ha kine ki sngi ki ban sa wan.
